ТҮРКІСТАНДЫҚ ЖАСТАР САЯБАҚТАРДА ТАЗАЛЫҚ ЖҰМЫСТАРЫН ЖҮРГІЗДІ

Түркістан қаласында «Таза Қазақстан» республикалық экологиялық акциясының «Таза өлке» апталығы аясында жұмыстар қарқынды жүруде. Шаһардың халық ең көп жиылатын демалыс орындарының бірі «Жеңіс» саябағында 100-ге жуық жас бірлесе тазалық жұмыстарын атқарды. Аталған шараға қалалық «Жастар ресурстық орталығы» мұрындық болған. Жастар демалыс орнын тазалап қана қоймай, талдарды әктеп және гүл мен көшет отырғызды. Сондай-ақ, саябақтағы ескерткіштер мен тақтайшаларды шаңнан тазалады.
Сонымен қатар, Түркістан қаласында экоакция аясында көктемгі уақытта 200 мың түп гүл, 104 мың дана түрлі көшеттер отырғызылып жатыр. Сондай-ақ, облыс орталығында тазалық жұмыстарына 300-ге жуық жұмысшы мен 34 техника жұмылдырылған.

Бұдан бөлек, шаһар аумағында былтыр көктем мезгілінде эустома, тәжігүл, шафран, шалфей, циннея, гейхера, гортензия, раушан, микс сынды жалпы 34 036 дана гүл егілген. Сондай-ақ, күз мезгілінде раушан гүл, хризантема, гортензия, қызғалдақ сынды жалпы саны 94 000 дана гүл егілді. Бұдан бөлек, мердігерлер тарапынан 34 000 дана көшет отырғызылған.