Елімізде алғаш болып Шымкенттегі егу бекеттеріне бейнебақылау камералары орнатылды. Бұл туралы Шымкент қалалық денсаулық сақтау басқармасының басшысы Позилов Бақытжан бұқаралық ақпарат құралдары өкілдерінің қатысуымен өткен баспасөз брифингінде мәлімдеді. аталған бейнебақылау камералары арқылы қауіпсіздікті нығайтуға болады.
Басқарма басшысы Б. Позиловтың сөзінше, қазіргі уақытта вакцинациялау жұмыстарын ұйымдастыру үшін қалада 45 егу бекеті жұмыс істеуде. Одан бөлек 25 жылжымалы егу бекеттері бар.
«Шымкент қаласы бойынша бүгінде I компонентпен 291 074 адамға, ІІ компонентпен 175 775 адамға вакцинациялау жасалды. Халық арасында вакцинациялау жұмыстары туралы түрлі қауесеттер тарауда. Жұмыстарды басты назарға алып, бақылауды одан әрі күшейту үшін егу бекеттеріне камералар орнатылды» — деді Б. Позилов.
Айта кетейік, тұрақсыз эпидемиялогиялық жағдайға байланысты қосымша дайындалған стационарларда науқастарды қабылдау жұмыстары басталып кетті. Шымкент қаласының медициналық ұйымдарында COVID-19 індетіне қарсы екі айлық дәрілік заттар және медициналық бұйымдар қоры бар.
