Шымкенттегі Әл-Фараби атындағы қалалық ғылыми-әмбебап кітапханасы – рухани қазына ордасы. Қазіргі таңда рухани шаңырақ халыққа кітапханалық-библиографиялық, ақпараттық қызмет көрсетуде. Бүгінде кітапхана қорында 400 мыңнан астам кітап пен 6546 дана электронды қоры бар. Ал, оқырмандар саны 18 600-ды құраса, келушілер саны 128 000, кітап берілімі 216 000. Мұнда 96 қызметкер еңбек етеді.
Кітапхана қазіргі таңда Қазақстанның ұлттық электронды кітапханасы және кітап.kz қорын толықтыруға белсене атсалысуда. Цифрлық заманда кітапхана мобильді, смартжоба – QR – кітапхананы жүзеге асырды. Бүгінде 60-қа жуық жергілікті авторлардың көркем шығармаларын оқырмандар кітапхана сайтындағы штрих – код арқылы оқи алады.
Кітапханада оқырмандардың қызығушылығына орай «Жас түлек», «Бәрін білгім келеді», «Мұрагер», «Дидарласу» Libclub «Глобус» мүдделестер клубтары белсенді жұмыс істейді.
Кітапхана қала аумағындағы кітапханалар үшін ғылыми-әдістемелік орталық болып табылады.
Айта кетейік, таяуда Әл-Фараби атындағы қалалық ғылыми-әмбебап кітапханасының жанынан аспан астындағы шағын кітап оқу орны пайда болды. Кез келген адам арнайы сөрелерге қойылған қазақ және орыс, және басқа тілдердегі кітаптарды оқуына болады. Кітаптар таңғы сағат 10.00-де қойылып, 20.00-де жиналып алынады.
