Бүгін «Таза қала» акциясы аясында Республика даңғылы мен Жангелдин көшесі аралығындағы Қошқар ата өзені бойы қоқыстан тазартылды. Тазалық шарасына «Нұр Отан» партиясы Шымкент қалалық филиалы төрағасының бірінші орынбасары Жанар Бектаева, Әл-Фараби ауданының әкімі Рашид Мыңбаев, Шымкент қалалық «Азаматтық Альянс» төрағасы Жұмағали Білісбеков және белсенді жастар атсалысты.
Акция барысында өзеннің беті жабайы шөптерден тазартылып, қураған бұтақтар арнайы орынға шығарылды. Оған қоса, су арнасының бітелген көздері ашылды. Сондай-ақ тазалық жұмыстары кезінде аталған аумақ толығымен тұрмыстық қатты қалдықтар мен пластикалық бөтелкелерден тазартылды. Бұл сенбілікке 13 арнайы техника мен 200-ге жуық адам жұмылдырылды.
«Таза қала» акциясы ары қарай да жалғасады. Іс-шараның басты мақсаты – тазалық жұмыстарын насихаттау, халық арасында қоқыс тастамау мәдениетін қалыптастыру.
Айта кетейік, аталған Әл-Фараби ауданында 7 коммуналдық мекеме, 1000-ға жуық жұмысшы таңмен таласып, кешке дейін қаланың тазалығы үшін тер төгеді.
