Шымкентте кәсіпорындарға да «Ashyq» мобильді қосымшасы орнатыла бастады. Азаматтардың коронавирус инфекциясына қатысты статусын анықтайтын құрал әзірге арнайы экономикалық аймақта орналасқан ірі компаниялардың кіре берісіне қойылуда. Өндіріс орындарындағы жұмысшылардың қауіпсіздігін қамтамасыз ету мақсатында қолға алынған жоба алдағы уақытта барлық кәсіпорындарды қамтымақ.
Бүгіннен бастап «Бал текстиль» кілем фабрикасына кіріп-шыққан әрбір азаматтың коронавирусқа қарсы статусы тексеріледі. Азаматтар туралы ақпараттың барлығы ортақ базаға тіркеледі. Ал, қандайда бір азаматтан қауіпті белгі байқалса бірден эпидемиолог мамандарға хабар түседі. Бұл осындағы 350-дей жұмысшының қауіпсіздігі үшін қажет дейді мамандар.
Ашық қосымшасынан бөлек бүгінде қаладағы кәсіпорындарда вакциациялау жұмыстары да қарқынды. Соңғы бір аптаның өзінде Шымкенттегі кәсіпорындарда мыңға жуық жұмысшы коронавирусқа қарсы екпе салдырған. Оның ішінде «АГФ груп» өндірістік кооперативінің 70 жұмысшысы бар.
Жалпы Шымкенттегі «Оңтүстік» арнайы экономикалық аймағында қазір 25 кәсіпорын жұмыс істеп тұр. Оларда шамамен 1600-ден астам адам еңбек етеді. Сол жандардың қауіпсіздігін қамтамасыз ету үшін аймақ дирекциясы барлық кәсіпорындарға ашық қосымшасын ендіруді жоспарлап отыр.
Айта кетейік, коронавирус инфекциясының алдын алу үшін жаппай вакцинациялау жұмыстары әлі де жалғасуда. Ол жұмыс қала аумағындағы 40-дан астам емдеу орындарында жүзеге асып жатыр. Одан бөлек арнайы мекемелерге барып екпе салумен айналысатын 25 мобилді топ жұмыс істеуде.
