Қаратау ауданы аумағын абаттандыру және көгалдандыру жұмыстары бұл жылы да қарқынды жүргізілді. Аталған жұмыстарды мердігер «Вuild stroi» ЖШС-і атқаруда.
Атап айтсақ, биыл ауданда 5 мыңнан аса шаршы метр аумаққа гүл отырғызылды. Яғни 44 қызметкер жұмылдырылып, Н.Назарбаев даңғылына – 1 250 м2, Арғынбеков көшесіне — 820 м2, С.Бәйтереков көшесіне — 225 м2, Асар шағынауданына – 450 м2, Нұрсәт гүлзарына – 65 м2, Бозарық шеңберіне — 2 450м2 аумаққа петунья, шафран, тагетис және өзге де жаздық гүл көшеттері отырғызылды.
Қазіргі таңда күннің қатты ысуына байланысты Қаратау ауданында жасыл желектерді суару жұмыстары да күшейді. Яғни, бүгінде кешкі және түнгі уақытта 20 суару техникасы жұмылдырылып отыр. Аудан аумағындағы көгалдандыру жұмыстарын жүргізетін мердігер мекеме «Build Stroi» ЖШС-і сонымен бірге көгалдардың арасын қоқыстардан тазарту, топырақты қопсыту және қураған бұталарды кесу жұмыстарымен де айналысады.
Айта кетейік, Қаратау аудандық полиция басқармасы Жергілікті полиция қызметі бөлімінің учаскелік полиция инспекторлары қаланың сәулеттік келбетіне кері әсерін тигізіп, көше бойына қоқыс тастаған жайттарды анықтау мақсатында профилактикалық іс-шараларды ұдайы жүргізіп отырады.
