Түркістандық 3585 тұрғынға қажетті медициналық құралдар берілген

Мемлекет тарапынан Қазақстан Республикасының әрбір азаматына өз деңгейінде көңіл бөлініп, қамқорлық танытылуы заңды құбылыс деуге болады. Күнделікті тұрмыс-тіршілікте жалпы адам мұндай қолдауларды сезіне бермеуі мүмкін. Қарапайым ғана мысал баланың тегін білім алуы, тұрғындардың тұрақты жұмыс орнымен қамтылуы, жұмыссыздардың жәрдемақы алу секілді түрлі бағыттағы мемлекеттік қолдаулар өз жалғасын тауып кете береді. Бүгінгі тақырып аясында да біз Түркістан қаласындағы осындай қолдау шараларының бір бағытына тоқталмақпыз. Осыған орай, Түркістан қалалық Жұмыспен қамту және әлеуметтік бағдарламалар бөліміндегі жұмыс барысымен танысқан едік.

Түркістан қаласында ерекше қажеттілігі бар 9523 азамат болса, соның ішінде 3585 тұрғынға қажетті медициналық құралдар берілген. Аталған азаматтарға мемлекет тарапынан жан-жақты жәрдем түрлері де қарастырылған. Оның ішінде, 380 азамат протез ортопедиялық құралдар, 270 тұрғын сурдо техникалық құралдармен 117 азамат, тифло техникалық құралдармен 283 адам қамтамасыз етілген. Одан бөлек, мүгедектігі бар 401 азамат жеке көмекші қызметіне жүгінсе, 95-і ымдау тілі маманы қызметімен қамтамасыз етілген. Сондай-ақ, жыл басынан бері, 1595 азаматқа міндетті гигиеналық құралдар берілген. Автокөлікпен тасымалдауда 151 азамат инватакси, 8 тұрғын әлеуметтік такси қызметіне жүгініпті. Бүгінге дейін ерекше қажеттілігі бар 245 азамат қоларбамен қамтылғанын айта кеткен жөн.

Түркістан қаласы Жұмыспен қамту және әлеуметтік бағдарламалар бөлімінде ерекше мұқтаждығы бар қала тұрғындарына оңалтудың жеке бағдарламасына сәйкес мемлекеттік қызмет көрсетілуде. Атап айтқанда, ерекше қажеттілігі бар азаматтарға әлеуметтік қызметтің: «инватакси» қызметі, жүріп тұруы қиын азаматтарға жеке көмекші тағайындау, азаматтардың жекеленген санаттарына әлеуметтік қолдау көрсету үшін міндетті гигиеналық құралдармен жабдықтау сынды көмек түрлері ұсынылған.

Былтыр сауықтыру орындарында 787 ерекше қажеттілігі бар азамат санаторий-курорттық еммен қамтамасыз етілген. Және 135 ерекше қажеттілігі бар адамды жұмыс орынына орналастыру жоспары жасалып, нәтижесінде 294 азамат жұмысқа орналасқан. Онымен қоса, ерекше қажеттілігі бар азаматтарды арнаулы әлеуметтік қызметтермен қамтамасыз ету жұмыстары жүзеге асырылуда.