ТҮРКІСТАН: МАҚТААРАЛДА МЕКТЕП ФОРМАЛАРЫН ТІГЕТІН ФАБРИКА АШЫЛМАҚ

Мақтаарал ауданының өндірістік әлеуеті жаңа деңгейге көтерілуде. Аудан әкімі Бақыт Асанов жуырда Қазақстан мен Қытай мемлекеттері арасындағы іскерлік ынтымақтастық негізінде құрылған «FANGAO киім тігу» ЖШС-нің өкілі Джу Ян Кун мырзаны ресми қабылдады. Бұл кездесудің басты тақырыбы – Атакент кентінде заманауи киім тігу фабрикасын ашу мәселесі болды.

Аталған кәсіпорын – екі ел арасындағы өндірістік кооперацияның жарқын көрінісі. «FANGAO» компаниясы Атакент кентінен жалпы көлемі 1200 шаршы метрді құрайтын, толық жөндеуден өткен ғимаратта киім тігу фабрикасын іске қосуды жоспарлап отыр. Бұл жоба аудан экономикасына елеулі серпін беріп қана қоймай, тоқыма және жеңіл өнеркәсіп саласында жаңа мүмкіндіктерге жол ашады. Фабриканың басты миссиясы – отандық нарыққа заманауи талаптарға сай, жоғары сапалы мектеп формаларын ұсыну. Алғашқы кезеңде Мақтаарал ауданы мен көршілес аудандардың мектеп оқушыларын толықтай отандық өніммен қамту көзделуде. Мұндай бастама ата-аналар үшін де тиімді, себебі сапа мен баға арасындағы тепе-теңдік сақталып, шетелдік өнімдерге тәуелділік азаяды. Болашақта фабрика өз өнімдерін еліміздің басқа өңірлеріне де ұсынуды жоспарлап отыр.

Жаңа өндіріс орнының іске қосылуы өңір үшін үлкен әлеуметтік маңызға ие. Жоспарға сәйкес, фабрика 200-ге жуық адамды тұрақты жұмыспен қамтитын болады. Бұл – жергілікті тұрғындар үшін табыс көзі ғана емес, кәсіби дамуға, жаңа дағдыларды меңгеруге мүмкіндік беретін алаң. Кәсіпорын шеберлікке мән беріп, сапалы кадрлық құрам қалыптастыру мақсатында маусым айының соңынан бастап жұмысқа қабылдау және оқыту кезеңдерін бастамақ. Болашақ қызметкерлер тігін ісінің қыр-сырын үйреніп, арнайы оқыту бағдарламаларынан өтеді. Мұндай әдіс кадрлардың біліктілігін арттырып қана қоймай, өнім сапасының жоғары болуын қамтамасыз етеді. «FANGAO» компаниясы болашақта өз брендін Қазақстан нарығында ғана емес, шетелдік нарықтарға да шығаруды көздеп отыр. Сұранысқа байланысты мектеп формасынан өзге де киім түрлері – спорттық киімдер, қызметтік униформалар және күнделікті киім үлгілері тігіледі. Бұл компанияның бәсекеге қабілетті, икемді әрі нарық сұранысына жауап беретін өндіріс орнына айналуына сеп болады.

Атакент кентінде ашылғалы отырған бұл фабрика – тек экономикалық жоба ғана емес, әлеуметтік тұрақтылықтың, жергілікті тұрғындарға қамқорлықтың және отандық өндірісті қолдаудың нақты үлгісі. «FANGAO» компаниясының бұл бастамасы — Мақтаарал өңірінің дамуына оң ықпалын тигізіп, Қазақстандағы жеңіл өнеркәсіптің өркендеуіне жол ашады деп сеніммен айтуға болады. Білім саласына қатысты ауданда мәжілістер өткізіліп келеді. Жиын барысында аудан аумағындағы мектеп оқушылары арасында кездесіп жүрген құқықбұзушылықтардың алдын алу, оқу жылының аяқталуына байланысты өтетін «Соңғы қоңырау» салтанатын ұйымдастыру, жазғы демалыс кезеңінде балалардың бос уақытын тиімді өткізу, шомылу маусымындағы қауіпсіздік шаралары және «Таза Қазақстан» экологиялық акциясы сынды маңызды мәселелер жан-жақты талқыланды. Аудан әкімі Бақыт Асанов жиынды аша отырып, жас ұрпақтың тәрбиесі мен қауіпсіздігі – мемлекеттік маңызы бар міндет екенін атап өтті. Ол мектеп оқушылары арасында тәртіп бұзушылықтар мен құқыққа қарсы әрекеттердің алдын алу үшін мектеп пен ата-ананың, сондай-ақ құқық қорғау органдары мен жергілікті атқарушы билік өкілдерінің тығыз байланыста жұмыс істеуінің маңыздылығына тоқталды. Сонымен қатар, мерекелік шара кезінде қауіпсіздік шараларын күшейтіп, полиция қызметкерлерімен бірлесіп бақылау жүргізу керектігі айтылды. Атап айтқанда, балаларды жазғы лагерьлерге жіберу, үйірмелер мен секцияларға тарту, еріктілер қозғалысына қатыстыру секілді жұмыстар күшейтілуі тиіс. Бұл оқушыларды жағымсыз әрекеттерден сақтандырып қана қоймай, олардың жан-жақты дамуына да ықпал етеді.

Жаз мезгілімен қатар келетін шомылу маусымы да өзекті мәселелердің бірі ретінде қарастырылды. Аудан әкімінің айтуынша, су айдындарында балалардың қауіпсіздігін қамтамасыз ету – басты міндет. Осы орайда, шомылатын аумақтарды белгілеу, суда жүзу қауіпсіздігі бойынша түсіндірме жұмыстарын жүргізу, құтқару бекеттерінің жұмысын күшейту тапсырылды. Ата-аналар мен мектеп ұжымдарына да бұл тұрғыда жауапкершілік жүктелді. Жиын соңында аудан әкімі Бақыт Асанов барлық қатысушыларға алдағы атқаратын істердің маңыздылығын тағы бір мәрте ескертіп, бұл жұмыстардың үйлесімді орындалуы жас ұрпақтың жарқын болашағына негіз болатынын атап өтті.

Ауданда шағын және орта бизнес жақсы жолға қойылған. Шағын кәсіпкерлікпен айналысатын тұлғалар саны 18 000-ға жетті, бұл салада 74 000-дай адам жұмыспен қамтылған. Өткен жылдың қорытындысы бойынша шағын бизнес өкілдері өндірген өнім көлемі 2 970,0 миллион теңгені құрады, бюджетке жалпы 115,9 миллион теңге салықтық төлемдер түсті. Ауданда 285 сауда нысаны, 142 қоғамдық тамақтану орны, 383 қызмет көрсету нысаны және 20 сауда базары жұмыс істейді . Ауданда мақта кластерін дамыту және терең өңдеуді арттыру мақсатында бірнеше инвестициялық жобалар жүзеге асырылуда. Мысалы, Өзбекстандық «Global Textile» компаниясымен келіссөздер жүргізіліп, мақта қабылдау зауыттарымен қоса мақтаны терең өңдеу фабрикаларын салу жоспарлануда. Мақтаарал ауданы мақта кластерін дамытуға ерекше көңіл бөлуде. 2023-2025 жылдары жалпы құны 21 миллиард теңгені құрайтын мақта-тоқыма кешенін және логистикалық хаб құру жобасы жүзеге асырылмақшы. Бұл жоба аясында 3 000 жаңа жұмыс орны ашылады. Сонымен қатар, өзбекстандық «Global Textile» компаниясы 2023-2027 жылдарға арналған «Global Textile Turkestan» жобасын әзірледі. Жоба құны 45 миллион долларды құрайды және мақта қабылдау бекеттері, мақта өңдеу зауыттары, мата бояу фабрикалары мен тігін фабрикаларын салуды көздейді. Бұл жобалар мақта өнімдерін терең өңдеуді арттырып, шикізат бағасының тұрақтылығын қамтамасыз етуге бағытталған.