ТҮРКІСТАН: САЙРАМДА «ТАЗА ҚАЗАҚСТАН» АКЦИЯСЫН ТҰРҒЫНДАРҒА КЕҢІНЕН АҚПАРАТТАНДЫРУ АЯСЫНДА АРНАЙЫ ТАҚТАЙШАЛАР ОРНАТЫЛДЫ

Бүгінде барша азаматтың табиғат алдындағы жауапкершілігін сезіндіру, табиғат пен адамзат арасында жаңа көзқарас қалыптастыру бағытында Үкімет тарапынан айрықша басымдық берілуде.

Бұл туралы Мемлекет басшысы Қасым-Жомарт Кемелұлы Тоқаев өз сөзінде «Қоғамда экологиялық мәдениет қалыптасып келеді. Бірақ өткір мәселелер де аз емес. Тазалықты сақтау үшін арнайы экологиялық шаралар өткізуге мәжбүрміз. Қазір елімізде «Таза Қазақстан» акциясы жүріп жатқанын білесіздер. Бұл жұмыстың тиімді болуы, ең алдымен, жұрттың сана-сезіміне байланысты. Пейілі таза адамның ісі берекелі болады» деп атап айтқан болатын.

Осы орайда, Сайрам ауданының әкімі Арман Сәбитовтің бастамасымен, тұрғындарға «Таза Қазақстан» акциясын кеңінен насихаттау мазмұнында аудан аумағындағы халық көп шоғырланатын жерлерге, орталық көше бойларына, саябақтар маңына арнайы тақтайшалар орнатылды.
Қанатты сөздер жазылған бұл тақтайшалар өз кезегінде ауданның бет-бейнесін бейнелеумен бірге, тұрғындардың қоршаған ортаға құрметпен қарауына септігін тигізеді. Сондай-ақ азаматтардың өмір сүру сапасы мен денсаулығын жақсартуға, жалпы қолайлы жағдай қалыптастыруға үлкен үлес қосатыны белгілі.