ТҮРКІСТАН: ТУРИЗМ САЛАСЫ ЭКОНОМИКАЛЫҚ ӨСІМГЕ ОҢ ЫҚПАЛ ЕТЕТІН БАСТЫ ҚҰРАЛ

Туризм Түркістан облысының негізгі табыс көздерінің бірі болып табылады. Туристердің келуі жергілікті кәсіпкерлерге, әсіресе қонақүйлер, мейрамханалар, сауда орындары мен көлік қызметтеріне кіріс әкеледі. Бұл саладан түскен қаржы облыс бюджетін толықтырады және өңірдің жалпы экономикалық өсіміне оң ықпал етеді. Түркістан облысы туризм саласында үлкен әлеуетке ие. Өңірге келушілер саны жыл сайын артып келеді. Түркістан қаласының Қазақстандағы және Орталық Азиядағы тарихи әрі рухани орталық ретіндегі мәртебесі ішкі және халықаралық туристер үшін ерекше қызығушылық тудыруда.

Туризм саласы жергілікті халықты жұмыс орындарымен қамтамасыз етеді. Қонақ үй қызметкерлері, экскурсоводтар, транспорт жүргізушілері, мейрамхана қызметкерлері және сувенир өндірісі сияқты салаларда көп адам жұмыспен қамтылады. Туристердің санын көбейту мақсатында жолдар, қонақ үйлер, мәдени-тарихи нысандарды қалпына келтіру мен дамыту қарқынды жүргізіледі. Бұл инфрақұрылымның жалпы дамуына оң әсерін тигізеді. Туризм мәдениетті сақтап, дамытуға, сондай-ақ халықтың өз мәдени мұрасына деген құрметін арттыруға ықпал етеді. Облыс тұрғындарының өмір сапасын жақсартуға әлеуметтік қызметтерге қосымша қолдау көрсетіледі. Түркістан облысының туризм саласы — өңірдің экономикасының маңызды драйвері. Бұл сала экономикалық өсімді жеделдетіп, жаңа жұмыс орындарын ашуға, инфрақұрылымды дамытуға және әлеуметтік тұрақтылықты қамтамасыз етуге көмектеседі. Сондықтан туризмді әрі қарай дамыту облыстың тұрақты әрі кешенді дамуы үшін аса қажет.

Түркістан қаласында 68 қонақүй мен хостел, сондай-ақ 160 жуық тамақтану орны қызмет көрсетуде. Халықаралық деңгейдегі қонақүйлер қатарында «Rixos Turkistan», «Karavansaray», «Ramada by Wyndham» және «Hampton by Hilton» бар. Аталған нысандардағы қызмет сапасы – басты назарда. Түркістан облысы әкімінің бірінші орынбасары Зұлпыхар Жолдасов қонақүй және мейрамхана басшыларымен кездесіп, саладағы өзекті мәселелерді талқылады. Еркін форматта талдау жүргізіліп, ашық сұхбат өтті.

– Бүгінде облыс орталығында халықаралық туризм дамып келеді. Шет мемлекеттен келушілер саны артуда. Бұл қонақүй және мейрамхалардың табысына оң әсер етіп жатыр. Сондықтан, қызмет көрсету сапасы жақсы, орта қонақтарға жайлы болу керек. Тіл және тәжірибелі кадрлар даярлау мәселесі де өзекті. «Атамекен» кәсіпкерлер палатасымен бірлесе жол картасын жасап, тұрақты түрде анализ жүргіземіз. Сіздерді Түркістанның мәртебесі үшін бірлесе жұмыс істеуге шақырамын. Әкімдік тарапынан тиісті қолдау көрсетіледі, – деді Зұлпыхар Жолдасов.

Салада 3 мыңнан астам адам жұмыс істейді. Ресми статистикалық деректерге сәйкес, 2025 жылдың 4 ай қорытындысымен туризм саласындағы негізгі капиталға тартылған инвестициялар көлемі 9,8 млрд теңгені құрады. Атап айтқанда, «Lords Heir» , «Khan Palace 2», «Yassy Hall and Apartments» қонақ үйлері мен «Болашақ құрылыс» ЖШС-нің демалыс аймағы және тағы басқа жобаларды жыл соңына дейін іске асыру жоспарланған. Бұдан бөлек, биыл туризм саласы бойынша облыс аумағында 47 туристік инвестициялық жобаны жүзеге асыру көзделуде. Сондай-ақ, Түркістан қаласында Күлтөбе қалашығын абаттандыру жобасы жүргізілуде.

Туризм басқармасы тарапынан әлеуметтік желілер мен платформаларда тұрақты түрде мониторинг жүргізіліп, туристер қалдырған пікірлер, ұсыныстар мен ескертулер сарапталды. Нәтижесінде, бірқатар кемшіліктер анықталды. Атап айтқанда, қызмет көрсету сапасына, гидтердің кәсіби деңгейіне, тазалыққа қатысты ескертулер мен ұсыныстар жазылған. Аталған мәселелерді ретке келтіру бойынша шаралар қабылдануда. Облыс әкімімен бекітілген 2025-2027 жылдарға арналған даму жоспарында саладағы кадрларды даярлау, сервис стандарттарын енгізу, туристік объектілердің сапасын арттыру бағытындағы шаралар қарастырылған. Сондай-ақ Түркістан облысының туристік инфрақұрылымын дамыту мақсатында туристік қызмет көрсету орындарына мониторинг жұмыстары жүргізілуде.

Басқосуда Түркістан облысы кәсіпкерлер палатасының директоры Асылан Ибадуллаев Облыстық кәсіпкерлер палатасында туризм жөніндегі салалық кәсіпкерлер кеңесі жеке құрылғанын атап өтіп, кеңес құрамында 40 кәсіпкер бар екенін айтты. Кеңес отырыстары тұрақты түрде өткізіліп, өзекті мәселелер көтеріліп, шешу жолдары қаралатынын жеткізді. Еуразиялық туризм қауымдастығының президенті Рысты Карабаева қызмет сапасын көтеру, тәжірибелі мамандар даярлау бойынша семинарлар мен тренингтер өткізуді ұсынды. Жергілікті кәсіпкерлер субсидия, кәріз жүйесі, кадр мәселелерін ортаға салып, ұсыныс-пікірлерін айтты. Туристер мен кәсіпкерлердің ұсыныстары назарға алынып, тиісті жұмыстар жүргізіледі.