Шымкент: Мүмкіндігі шектеулі жандар – ерекше назарда

Мемлекет басшысы Қасым-Жомарт Тоқаев Ұлттық қоғамдық сенім кеңесінің отырысында мүмкіндігі шектеулі жандар үшін кедергісіз орта қалыптастыру ерекше маңызға ие екенін мәлім еткен болатын.

«Мемлекет инклюзивті білім беру саласына, кедергісіз орта қалыптастыруға, мүмкіндігі шектеулі жандарға инфрақұрылымның қолжетімділігін арттыру мәселелеріне көбірек назар аудара бастады. Бұл ретте мемлекет пен әкімдер жүйелірек жұмыс жүргізуі керек. Оларды мемлекеттік тұрғыда ынталандыру тетіктері қарастырылуы керек деп санаймын. 2022 жылы Қазақстан қабылдаған Мүгедектердің құқықтары туралы конвенцияның факультативті хаттамасы ратификациялануы керек деп есептеймін», – деген еді Президент Ұлттық қоғамдық сенім кеңесінің отырысында.

Бүгінде Шымкентте жұмыспен қамту және әлеуметтік қорғау басқармасы тарапынан қаладағы мүмкіндігі шектеулі жандар үшін кедергісіз орта қалыптастыруда тиісті шаралар атқарылып жатыр. Мүгедектігі бар азаматтардың белсенді өмір сүру салтын қалыптастыру мақсатында инватакси ұйымдастырылған.

Шымкент қаласында мүгедектерге арналған такси қызметі пайда болғанына биыл 10 жыл. Жоба «Қалалық мүгедектер қоғамы» бірлестігінің бастамасымен жүзеге асқан. Инватакси қызметін жыл басынан бері 500-ден астам азамат қызмет алуға өтініш тапсырған. Күніне 170-180 тапсырыс қабылданады. Өтініш беруші 1 күн бұрын диспетчерге (8 (7252) 57-70-06) хабарласып тапсырыс қалдыра алады. Инватакси қызметі тегін.

Бекітілген 18 автокөлік арнайы жылжымалы құрылғымен және кресло-арбаларды орнатуға арналған құралдармен жабдықталған. Арнайы көліктермен азаматтар қала ішіндегі қалаған мекен-жайына бара алады.

Айта кетейік, бүгінде Шымкент қаласында 37 046 мүмкіндігі шектеулі азамат тіркелген. Оның ішінде: бірінші топ-3324, екінші топ-14 950, үшінші топ – 12 288. Ал 18 жасқа дейінгі 6484 мүгедек бала тіркелген.