ҚАРАҚҰР АУЫЛЫНДА ЖАҢАДАН САЛЫНҒАН НЫСАНДАР МЕН АЛДАҒЫ МІНДЕТТЕР БАЯНДАЛДЫ

Созақ ауданының әкімі Мұхит Тұрысбеков Қарақұр ауылдық округінің тұрғындарымен кездесу өткізіп, алдағы жұмыстарды кеңінен баяндады.

– Бүгін сіздермен кездесіп, болашақта атқарылатын жобаларды талқылау үшін жиналып отырмыз. Сіздің ұсыныс-пікірлеріңізді тыңдап, ортақ жоспарымызды бірлесе нақтылайтын боламыз. Биыл Қарақұр ауылдық округі әкімі аппаратының жаңа ғимараты мен заманауи жабдықталған жабық ойын алаңшасы пайдалануға берілді. Мұндай жұмыстар дәстүрлі түрде барлық ауылдық округтерде жалғасын табатын болады. Қатты тұрмыстық қалдықтар үшін полигонның құрылысы жалғасуда. Сонымен қатар, 1,4 шақырымды құрайтын Құрманғазы көшесі мен Шаға және Раң елді мекендеріндегі ішкі көшелерге жарықшамдар орнатылды. Осылайша, ауыл округті кешенді дамыту мақсатында қажетті жұмыстарды кезең-кезеңімен жүзеге асырудамыз. Сіздердің көтерген мәселелеріңіз біз үшін өте маңызды және оларды шешу үшін барлық мүмкіндіктерді пайдаланамыз,-деді аудан басшысы.

Сонымен қатар, ауыл тазалығына қатысты шараларға назар аударып, келер жылы барлық округтерді тазалық жұмыстарын жүргізуге қажетті техникамен қамту жоспарда екенін тілге тиек етті.

Кездесу барысында тұрғындар аудан әкімдігі тарапынан жасалып жатқан жұмыстарды жоғары бағалап, алғыстарын білдірді. Келелі мәселелер мен ұсыныстарын ортаға салып, сала мамандары тарапынан нақты жауаптар алды. Бірқатар тұрғындар жеке мәселелері бойынша қабылдауға жүгінді. Жұмыспен қамту, жайылымдық жер және әлеуметтік мәселелер жөнінде өтініштерін білдірді. Әр мәселе толыққанды тыңдалып, қолдау көрсету шаралары қарастырылды.