15 жастағы оқушы қыз жұмыс орнында көз жұмды

Шымкенттегі кафелердің бірінде жұмыс істеп жүрген 15 жастағы мектеп оқушысы қайтыс болды. Бұл туралы Infonews.kz сайты OTYRAR басылымына сілтеме жасап хабарлайды.

Ақару Құралбай 9 сыныпты бітіріп, аттестат алған. Қыз демалысқа ақша жинап, анасына көмектескен.

– «Мен оны мәйітханадан көргенімде, беті көгерген, құлағының артында қан, басында гематома болған», – дейді марқұмның анасы Бибіғайша Құттыбаева.

Қайғылы оқиға 3 шілде күні Шымкенттің ойын-сауық орталықтарының біріндегі кафеде болған. Алдымен туыстарына қоңырау шалып, жасөспірім электр тоғынан қайтыс болды деп мәлімдеген. Кейін жұмыс орны өлімге басқа нәрсе себеп болғанын айтты.

– «Олардың айтуынша, таңертең Ақару келіп, аш қарынға энергетикалық сусын ішкен. Содан кейін оның жүрегі ауырып, құлап қалған. Бұл таңқаларлық жайт, бастапқыда бізге электр тоғынан көз жұмғаны туралы айтылды. Біз онымен бірге жұмыс істеген қыздан сұрадық. Ол әпкесінің басынан түтін шыққанын айтты», – дейді марқұмның ағасы.

Марқұмның туыстарының қолында сараптама қорытындысы бар, сарапшылар қыздың электр тоғынан қайтыс болғанын айтады. Сараптаманың негізгі қорытындысы 20 күннен кейін дайын болады.