ҚАЛА ӘКІМІ ОРТАЛЫҚ СУ СПОРТ КЕШЕНІНЕ БАРДЫ

Бұл – «Шымкент» Орталық су-спорт кешені. Әл-Фараби ауданы, Қазиев көшесі 2в мекенжайында орналасқан. Мұнда жүзуден оқу-жаттығу жиындары мен спорттық жарыстар өтеді.

Шымкент әкімі Мұрат Әйтенов спорт кешенінің жұмысымен танысты. Қалада жастар арасында жүзу мен гимнастика кең тарағанын айтқан шаһар басшысы мұндай спорт кешендерін көптеп салу қажеттігін жеткізді.

Орталық су кешенінің жалпы ауданы 5555 шаршы метр. Жүзу алаңы, асхана, медициналық кабинет, тренажер залы, 2 киім ауыстыратын бөлме, 725 көрерменге арналған орындық бар. 2012 жылы пайдалануға берілген.

Сегіз жүзу жолағы бар. Бір мезетте 96 спортшыны қабылдауға мүмкіндігі бар.

Қала басшысы су кешеніне келушілер үшін, әсіресе мектеп оқушылары үшін жеңілдетілген тарифтер қарастырып, санитарлық-гигиеналық талаптардың қатаң сақталуын тапсырды.

Еске сала кетсек, Мемлекет басшысының бұқаралық спортты дамыту, балаларға спорттық инфрақұрылымның қолжетімді болуын қамтамасыз ету тапсырмасы бойынша биыл Шымкент қаласында 115 спорт алаңшасын іске қосу жоспарланған. Заманауи спорттық нысандар қала орталығынан шалғайда жатқан тұрғын алаптар мен шағын аудандарға орналастырылмақ.