ТӘУЕЛСІЗДІКТІҢ ҚҰРДАСЫ СПОРТ ПЕН ҚЫЗМЕТТІ ҚАТАР АЛЫП КЕЛЕДІ

Егемендіктің ақ таңымен 1991 жылы дүниеге келген тәуелсіздік құрдастары бүгінде буыны қатайып, еліміздің дамуы мен өркендеуіне өз үлестерін қосып келеді.

Бүгін біз спорт пен қызметті бірге ұштастырып жүрген тәуелсіздіктің төл құрдасы – Әлібек Жұманов туралы айтатын боламыз.

Шымкент қаласындағы №2 өрт сөндіру бөлімінің аға өрт сөндіруші қызметін атқарады. Жастайынан өз өмірін спортпен байланыстырып, біршама жетістіктерге жеткен, қазіргі кезде бар күш-жігерін өрт сөндіру саласына жұмсап, адам өмірін құтқаруда алдыңғы шепте көрініп жүрген маман.

Футболдан өткен Қазақстанның біріншіліктерінде топ жарып, «Үздік қорғаушы» номинацияларына ие болып, «Ордабасы» футбол командасының беделді мүшесі ретінде танылған спортшы. Әлі күнге дейін спорт пен қызметті бірге ұштастырып, белсенділік танытып жүр. Ата-анасының мақтанышы. Тәуелсіз еліміздің жарқын болашағы.

Айта кетсек, 2021 жыл – Тәуелсіздіктің 30 жылдығы. Өткенге ой салып, бүгінімізді бағалап, келешекке жоспар құратын маңызды жыл. Елбасы Нұрсұлтан Әбішұлы Назарбаевтың Тәуелсіздікке қол жеткізіп, мықты мемлекет қалыптастырудағы рөлін атап өтуге тиіспіз. Отыз жылда Қазақстан бір ғасырға бергісін өзгерісті бастан өткерді. Мәселен, Шымкенттің өзін алар болсақ, қала халқы 90-шы жылдары 400 мыңнан астам болса, қазіргі таңда бір миллионнан асып отыр. Яғни, Шымкенттің әр екінші тұрғыны Тәуелсіздік тумасы.