Суарудың тиімді тәсілі

Елімізде жаңа технологияны тиімді пайдаланып, өнім көлемін арттырып жүрген шаруалар аз емес. Бұрын шаруалар көктемгі жаңбыр суынан кейін бір рет қана өнім алатын болса, қазіргі технология бойынша жаңбырлатып және тамшылатып суару әдістерін қолдану арқылы бір жылда екі-үш рет өнім алуға қол жеткізіп отыр.  Әсіресе, жаңбырлатып суару әдісінің  арқасында бұрын игерілмей бос жатқан жерлер айналымға қосылып жатыр.

Ордабасы ауданы, Қажымұқан ауыл округіндегі «Жан 2004» өндірістік кооперативі бүгінде егіс алқаптарына заманауи құрылғылар орнатып, жаңбырлатып және тамшылатып суару әдістеріне көшкен.

Кооператив төрағасы  Әбдісалан  Сағымбек өздеріне тиесілі 200 гектар жердің 170 гектарын Түркиядан әкелінген арнайы техника арқылы жаңбырлатып суарып жатқандықтарын айтады. Қалған 30 гектар жерге тамшылатып суару әдісін қолданыпты. Жоба құны 105 млн. теңге болса, оның

50 пайызы мемлекет тарапынан субсидияланған.

– Қазір 70 гектар алқапқа бидай егіп жатырмыз. Көктемде 100 гектар жерге жоңышқа, 30 гектарға қауын-қарбыз, пияз егуді жоспарлап отырмыз.  Бұл құрылғыларды биыл бірінші рет пайдаланбақшымыз. Бүгінде екі қондырғыны орнаттық. Тағы бір қондырғы әкелеміз. Егіс алқабына төрт құдық қазып, екі тоған жасадық.  Бұл жазық жер болған соң ағын су келмейді. Егістікпен айналысатын болсаңыз тек қана жаңбырды күтесіз. Жаңбыр болмаса, егініміз шықпай қалады. Содан бұл жер бос жатты. Ойлана келе осы жаңа технологияны сатып алуға шешім қабылдадым.  Сол себепті біз суарудың тиімді тәсіліне көшіп, су үнемдеу технологиясын орнаттық.   Қазіргі таңда егістік алқапта 12 адам жұмыс істеп жатыр, – дейді Әбдісалан Сағымбек.

Мамандардың айтуынша, жаңбырлатып суару технологиясы арқылы дақыл түріне қарай өнімділік 2-4 есеге дейін артады.  Әрі суды екі-үш есеге дейін үнемдейді. Жаңбырлатып суарудың тиімділігін түсінген шаруалардың қатары да күн санап көбейіп келеді.   Сондай-ақ, осы әдісті пайдалана отырып, диқандар жазық жерде тек мал азығы дақылдарын ғана емес, жаңа технологияның көмегімен көкөніс, бақша дақылдарын да өсіре алады.  Бұл халықтың әл-ауқатын арттырып қана қоймай, өңірдегі экологиялық жағдайдың жақсаруына да зор серпін береді.