Бәйдібек ауданында жылыжай шаруашылығы қарқынды дамып келеді

Түркістан облысына қарасты Бәйдібек ауданында жылыжай шаруашылығы қарқынды дамып келеді. Бүгінде мұнда ірілі-ұсақты бірнеше жылыжай бар. Соның арқасында жергілікті тұрғындар көкөніс, бау-бақша өнімдерімен толық қамтылып келеді. Алыстан ат сабылтып облыс орталығына барып, көкөніс сатып алудан құтылды ауыл жұрты. Аудан орталығындағы не болмаса ауыл ауылдардағы дүкендерде жергілікті жылыжайда өндірілген өнім самсап тұр. Жылыжай шаруашылығы оңай кәсіп емес. Әр өнім мұқият күтімді талап етеді. Кәсіпкердің басты мақсаты тамшылатып суару құрылғысын пайдалану арқылы жылыжайда көкөністер өсіру, баламалы энергия көздерін қолдану арқылы табиғи және технологиялық ресурстарды тиімді пайдалану болып отыр. Қолынан іс келетін іскер кәсіпкер істің көзін тауып отыр.

Бәйдібек ауданының ауа-райы жылыжай шаруашылығын өркендетуге қолайсыздау әрине, әсіресе жылыжайы көп өзге аудандармен салыстырғанда. Олардағыдай жылыжай шаруашылығы өркендеп кетпегенімен,тәуекел етіп, тұрғылықты халыққа жылыжайдан жаңадан жұлынған көкөнісін ұсынып, өздерін жұмыспен қамтып отырған кәсіпкерлер көп болмаса да,бар. Солардың бірі — Шаян ауылының тұрғыны, жеке кәсіпкер Баян Қаңлыбаева. Көп жылдан бері үй іргелік 330 шаршы метр жеріне жылыжай салып,оған қияр, қызанақ сияқты көкөністер егіп, өнімін аудан орталығындағы дүкендерге өткізіп жүр әрі сатылымы да жақсы. Жылына 2-3 рет өнім алатын жылыжайында 2-3 күн бұрын қияр егіп, тамшылатып суғару жүйесін қосып қойған. Дәл осы әдіс өте тиімді дейді кәсіпкер. Замануи барлық технологияны қолданып, өнім өнімділігін арттыру басты мақсаты болып отыр. Көзін тапса, ауа-райы қолайсыз делінетін Бәйдібек ауданында да жылыжайдан пайда табуға болатынын, ол үшін жылыжайда көкөніс егудің қыр-сырын терең меңгерудің қажеттілігін айтқан Баянның сөзінің жаны бар. Ауданда кәсіппен айналысам деуші азаматтарға әрқашанда қолдау көрсетіліп отыр. Кәсіпкер болашақта өзінің кәсібін жоғары деңгейге дейін көтеріп, ауқымын кеңейтуге ниетті. Ол үшін мемлекет тарапынан барлық жағдай жасалынған. Көзін тапса табыс түсірмейтін сала жоқ екенін дәлелдеп келеді.