Түркістандықтар армрестлингтен әлем чемпионатында жеңіске жетті

Алматы қаласында өткен Армрестлингтен 44-ші әлем чемпионатында Түркістан облысы Шардара ауданының спортшылары қанжығаларына 28 алтын медальді байлап, Қазақстан Республикасының Гимнің 28 рет шырқатты. Және бұл медальдарға қоса жерлестеріміз 10 күміс, 5 қола медальға қол жеткізіп әлемдегі теңдеусіз клуб екенін тағы да дәлелдеді. Сонымен қатар Қазақстан құрамасы командалық есепте 1 орынды абыроймен жеңіп алды.
Қол күресі спорты елімізде айрықша дамыған аймақтың бірі – Шардара ауданы. Шардаралық Армспорт мектебін «Чемпиондар шеберханасы» деп атауға болады. 2001 жылы негізі қаланған «Shardara Arm» спорт кешенінен бүгінге дейін 130 әлем чемпионы, 300 Азия чемпионы, 462 ҚР чемпионы шыққан. Бұған халықаралық жарыстар мен республикалық турнирлерді қоссаңыз аймақтан шыққан білекті де жүректі қыз-жігіттердің жетістігін айтып жеткізудің өзі артық. … Соның ішінде Шардара Армрестлинг клубы 2012 жылдан бері жалпы есепте 1-орын иеленіп жүр.
Жерлестеріміз осы жолы да әлемнің мықтылары сыналған шаршы алаңда ел намысын лайықты қорғап, толағай табыстарға жетті. Осы орайда еліміздің абыройын асқақтатып, жеңістің жарқын үлгісін көрсеткен отандастарымызды жеңістерімен шын жүректен құттықтаймын!

Сіздерге зор денсаулық, отбасыларыңызға береке-бірлік, ел игілігі жолында талай белестерді бағындыра берулеріңізге тілектеспін.
Барша қазақстандықтарды жеңіспен құттықтаймын!