ШЫМКЕНТ: ҚАЛА ТҰРҒЫНДАРЫН САПАЛЫ АУЫЗ СУМЕН ҚАМТУ КӨРСЕТКІШІ АРТУДА

Бүгін Ақпараттық-коммуникациялық орталығында Шымкент қалалық Энергетика және инфрақұрылымды дамыту басқармасының басшысы Б.Булатбековтың қатысуымен брифинг өтті.

Баспасөз мәжілісінде Боранбай Нигметұлы қала тұрғындарын ауыз сумен қамтамасыз ету жұмыстары туралы айтты.

– Қазіргі таңда қалада 81 елді мекеннің 5 елді мекені (Сайрам, Құрсай, Қайнарбұлақ, Сәуле, Жаңаталап) кестемен, 7-еуі (Тұран, Солтүстік саяжай, Ынтымақ-2, Батыс, Жаңатұрлан, Ақтас, Асар-2) тасымалды ауыз сумен, ал 69-ы сапалы ауыз сумен қамтамасыз етілді. Биыл аталған елді мекендерді ауыз сумен қамтамасыз ету мақсатында 14 нысанның (о.і. 3 магистралды суаққы, 11 ішкі орамдық жүйе) құрылыс жұмыстары жүргізілуде. Осы жылы 3 магистралды суаққы, тасымалды 7 елді мекен және кестемен 2 елді мекеннің құрылысы аяқталып, 25,6 мың адам ауыз сумен қамтылады. Нәтижесінде, қамтылу көрсеткіші 95,6%-дан 98 пайызға өседі, – деді басқарма басшысы.

Спикердің сөзінше, Қаратау ауданы бойынша 3 магистралды суаққының (4,48 шқ; 9,37шқ; 10,61 шқ) және 3 шағын ауданда (Тұран, Асар-2, Нұртас), Әл-Фараби ауданы бойынша 2 шағын ауданда (Сәуле, Ақтас), Абай ауданы бойынша 6 шағын ауданда (Ынтымақ-2, Батыс-Жаңатұрлан, Жаңаталап, Солтүстік саяжай, Құрсай 1 этап, Құрсай 2 этап) ішкі ауыз су жүйесінің құрылыс жұмыстары жүргізілуде.

Айта кетейік, осы жылы Қаратау мен Әл-Фараби аудандарында құрылыс жұмыстары аяқталып, пайдалануға беріледі. Ал жыл қорытындысымен Абай ауданындағы 5 шағын ауданда (Ынтымақ-2, Батыс-Жаңатұрлан, Жаңаталап, Солтүстік саяжай) құрылыс жұмыстары аяқталып пайдалануға берілсе, 1 шағын аудандағы (Құрсай 1 этап, Құрсай 2 этап) құрылыс жұмыстары келесі жылға өтпелі болмақ.