ТҮРКІСТАН: ҚҰҚЫҚБҰЗУШЫЛЫҚТЫҢ АЛДЫН АЛУ ЖҰМЫСТАРЫ ҚАРАЛДЫ

Түркістан қаласының прокуратурасы мен Түркістан облысының кәсіпкерлер палатасы «Кәсіпкерлердің құқықтарын қорғау және оларға мемлекеттік қолдау көрсетудің өзекті мәселелері» тақырыбында бірлескен кездесу ұйымдастырды. Кездесуге қала прокуратурасы, қала әкімдігі мен дербес бөлімдері, департаменттер және басқармалармен қатар қаланың бизнес өкілдері шақырылып, 30-ға  жуық кәсіпкерлер қатысты.

Түркістан облыс орталығы мәртебесін алғалы прокуратура 4 жылда 6 мыңға жуық кәсіпкердің құқықтары мен заңды мүдделерін қорғаған. Олардың арасында өрескел заң бұзушылықтар жасағандары да жасырын емес. Дәлірек айтсақ, өңірде 11 кәсіпкер заңсыз әкімшілік жауаптылыққа тартылса, 8 кәсіпкерге санитариялық-эпидемиологиялық қорытынды беруден негізсіз бас тартылған, ал 6 кәсіпкердің өтінішін қарау созбалаңға салынған. Кездесу барысында осы және өзге де мәселеге қатысты түрлі уәкілетті мемлекеттік орган өкілдері сөз сөйлеп, кәсіпкерлік субъектілердің құқықтарын қорғау бағытында атқарған жұмыстары, бизнеске қолдау көрсетудегі өзекті мәселелер талқыланды.

«Біз ел Президенті Қ.Тоқаевтың бизнесті қолдау саясатын тікелей Түркістан қаласы аймағында жүргіземіз. Нақтырақ айтқанда, кәсіпкерлерге қолдау көрсетеміз. Жаңа жұмыс орындарын ашуға көмектесеміз. Салықтарға қатысты түсіндірме жұмыстарын жүргіземіз. Әсем қаламыздың туризм саласын дамытуға бірге атсалысамыз. Қаржылай көмек ретінде мемлекеттің арнайы бағдарламалары және қайтарымсыз несие бар. «Еңбек» бағдарламасы аясында қайтарымсыз грант 1 миллион 200 теңгеден 273 кәсіпкерге несие беріледі. Одан бөлек, «Атамекен» Өңірлік кәсіпкерлер кеңесінің «Кәсіпкерлік қырандары» жобасы және  бизнес жол картасы аясында, сонымен қатар Керуен Сарай және экобазар кешендерінде сауда жасайтын кәсіпкерлерге 4 пайызбен несие беріледі», – дейді Түркістан қаласы әкімдігінің бизнесті және туризімді қолдау бөлімінің басшысы Талғат Алпысбайұлы.

Жиын соңында бизнес өкілдерінің нақты мәселелері тыңдалып, олардың уәждері бойынша заңнама талаптары түсіндіріліп, жауапты лауазымды тұлғаларға тапсырмалар берілді.

Түркістан қаласы прокуроры-ның жанындағы құқықбұзушы-лық профилактикасы жөніндегі  ведомствоаралық комиссияның жиналысы өткізілді. Кезекті отырысқа комиссия мүшелері, басқарма және департамент төрағалары, бөлім басшылары, колледж және мектеп директорлары қатысып, Түркістан қаласындағы құқықбұзушылық профилактикасы жөніндегі жұмыстардың жай-күйі қаралды.

Оның ішінде жалпы қылмыстылық және құқық бұзушылық профилактикасының жағдайын талқылап, нақты міндеттемелер белгілеу мәселесі қалалық прокуратураның бастамасымен енгізілді.

Мәжілісте қала  прокурорының орынбасары Күмісхан Танатов баяндама жасап, әрбір қалада және аймақта орын алған қылмыстарға, олардың орын алу себептеріне және алдағы уақытта атқарылуы тиіс жұмыстарға жеке тоқталды.

Отырыста бұзақылық, есірткінің заңсыз айналымы, алаяқтық, мал ұрлығы, жол-көлік оқиғалары және кәмелетке толмағандардың мәселесі кеңінен талқыланып, полиция бөлімінің және әкімдікке қарасты жауапты құрылымдардың есептері тыңдалды.

Күн тәртібіндегі басқа да мәселелер бойынша Түркістан қаласының полиция басқармасы бастығының бірінші орынбасары Шералы Әділханұлы,  қала әкімінің орынбасары  Талғат Байжанұлы, қалалық адами әлеуетті дамыту бөлімінің басшысы Оразкүл Шайхықызы жылдық және айлық есептен хабарлама жасады. Аталған тұлғалар құқық бұзушылық профилактикасы бағытында құзыреттілік шегінде атқарылған жұмыстарды баяндап, ұсыныстарын білдірді.

Отырыста қаралған мәселелер және олар бойынша туындаған ұсыныс-пікірлер жан-жақты талқыланып, тиісті шешімдер қабылданды. Жиында қала прокуроры Түркістан қаласының әкімімен 27.01.2020 жылы бекітілген «Түркістан – қауіпсіз қала» бағдарламасының іс-шаралар жоспары толық орындалмағанын сынға алып, қала әкімдігі жанындағы құқықбұзушылық профилактикасы жөніндегі ведомствоаралық комиссия мен кәмелетке толмағандардың ісі және олардың құқықтарын қорғау жөніндегі комиссияның жұмыстары күшейту қажеттігіне назар аударды.

Жиын соңында Түркістан қаласының әкімі Нұрбол Тұрашбеков құқық бұзушылық профилактикасы, оның ішінде бұзақылық, есірткінің заңсыз айналымы, алаяқтық, мал ұрлығы қылмыстарының және жол-көлік оқиғаларының, сондай-ақ жастар тәрбиесі мен олардың қауіпсіздігі мәселесіне арнайы тоқталып, атқарылуы қажет жұмыстар бойынша тиісті сала басшыларына нақты тапсырмалар жүктеді.