АЗАМАТТАРДЫҢ ӨТІНІШТЕРІ ТЫҢДАЛДЫ

Қазақстанда соңғы жылдары саяси мәдениетті дамыту мен халықтың билікке сенімін арттыру бағытында бірқатар жүйелі қадамдар жасалды. Оның ішінде «Халық үніне құлақ асатын мемлекет» тұжырымдамасы ерекше орын алады. Бұл бастама мемлекеттің халықпен ашық диалог орнатуын, тұрғындардың күнделікті мәселелерін назардан тыс қалдырмауды және азаматтардың саяси шешімдерге тікелей араласу мүмкіндігін қамтамасыз етуді көздейді.

Шымкент қаласында осы қағидатқа сай «AMANAT» партиясының қоғамдық қабылдау бөлмелерінде тұрақты кездесулер өткізіліп келеді. Жақында Тұран аудандық филиалында өткен қабылдауды Атқарушы хатшы Есімхан Бертаев жүргізді.

Кездесуге келген тұрғындар инфрақұрылым жүйесін жетілдіру, жұмыспен қамту, әлеуметтік көмек пен тұрғын үй мәселелерін көтерді. Бұл проблемалардың көпшілігі қаланың жаңа аудандары үшін өзекті болып отыр. Мысалы, Шымкентте соңғы бес жылда халық саны жылына орта есеппен 40 мың адамға өсіп келеді. Соған сай мектеп, балабақша, инженерлік жүйелер мен тұрғын үйге деген сұраныс артқан.

Әрбір өтініш заң талаптарына сәйкес қаралып, азаматтарға түсініктемелер берілді. Шешімін табуы уақытты қажет ететін ұсыныстар хаттамаға енгізіліп, тиісті мекемелердің бақылауына жіберілді.

Осыған ұқсас қабылдау партияның қалалық филиалында да өтті. Мәслихат депутаты Альбина Елшиева «Құқықтық көмек» партиялық жобасы аясында азаматтарды қабылдап, жеке сұрақтарына жауап берді.

Кездесу барысында тұрғындардың басым бөлігі тұрғын үй кезегіне тұру, әлеуметтік төлемдер, еңбек құқықтарын қорғау мәселелерін қозғады. Депутат әрбір ұсынысты мұқият тыңдап, бірқатар мәселенің шешімін жеделдетті. Мәселен, тұрғын үй кезегіндегі құжаттардың рәсімделуіне қатысты түсініспеушіліктер қабылдау барысында шешімін тапты.

Қоғамдық қабылдаулардың маңызы тек тұрмыстық мәселелерді шешумен шектелмейді. Бұл – азаматтардың саяси процестерге араласуының нақты құралы. Мұндай кездесулерде халық өз ұсыныстары мен пікірін білдіріп, жергілікті биліктің шешімдеріне ықпал ете алады.

Мемлекет басшысы Қасым-Жомарт Тоқаев айтқандай, «Еститін мемлекет» – халықтың сенімін арттыратын басты фактор. Демек, қоғамдық қабылдаулар – демократиялық құндылықтардың нақты іске асу алаңы.

Кейбір қабылдаулардың нәтижесінде көп жылдан бері шешімін таппай келген мәселелер қозғалып, қысқа уақытта оң шешімін табады. Мәселен, өткен жылы қала шетіндегі бір шағынаудан тұрғындары бірнеше жыл бойы электр қуатының тұрақсыздығына шағымданған болатын. Қабылдаудан кейін бір ай ішінде жаңа трансформатор орнатылып, мәселе толық шешілді. Бұл – «халықтың даусы» нақты әрекетке ұласқан сирек, бірақ маңызды мысалдардың бірі.

Халық үніне құлақ асатын мемлекет – құр сөз емес, нақты іспен дәлелденіп жатқан тұжырымдама. Қоғамдық қабылдаулар арқылы әрбір азаматтың үні тыңдалып, құқықтары қорғалады. Бұл – Қазақстандағы демократиялық мәдениеттің дамуына, халық пен билік арасындағы сенімнің артуына жол ашатын маңызды қадам.

Бүгінгі таңда әрбір тұрғынның белсенділігі, ұсыныстары мен шағымдары елдің саяси дамуына тікелей ықпал етуде. Сондықтан азаматтардың саяси шешімдерге қатысу құқығы – мемлекет пен қоғамның ортақ жетістігінің кепілі.