ТҮРКІСТАН ОБЛЫСЫНДА «ЖАСЫЛ ЭКОНОМИКА» ҚАҒИДАТТАРЫН ІСКЕ АСЫРУ ЖҰМЫСТАРЫ ҚАРҚЫН АЛУДА

Түркістан облысында тұрақты экономикалық өсімді қамтамасыз ету, қоршаған ортаны қорғау және табиғи ресурстарды тиімді пайдалану мақсатында «жасыл экономика» қағидаттарын енгізу бағытындағы жұмыстар жүйелі түрде жүргізілуде. Бүгінде өңірде жаңартылатын энергия көздерін дамыту, су ресурстарын үнемдеу, экологиялық тепе-теңдікті сақтау, энергия тиімділігін арттыру және қоршаған ортаға түсетін жүктемені азайтуға бағытталған жобалар жүзеге асырылып келеді.

Осы мақсатта Түркістан облысы мен Қытайдың жетекші инфрақұрылымдық холдингі арасындағы ынтымақтастықтың жаңа кезеңі басталды. Шетелдік инвесторлармен ірі жобаларды жүзеге асыру жұмыстары басталды. Түркістан облысының әкімі Нұралхан Көшеровтің Қытай Халық Республикасына жұмыс сапары барысында әлемдік деңгейдегі бірқатар ірі компаниялармен келіссөздер жүргізіліп, нәтижесінде өңір экономикасын дамытуға бағытталған жаңа инвестициялық жобалар пулы қалыптасты.

Кездесу барысында тараптар ең алдымен экологиялық инфрақұрылымды дамыту мәселелеріне назар аударды. Әсіресе шалғай елді мекендерде, туристік нысандарда, индустриялық аймақтар мен жол бойындағы сервистік кешендерде қолданылатын заманауи үлгідегі таралған ағынды су тазарту қондырғыларын енгізу мүмкіндіктері қарастырылды. Қытай тарапы кездесуде интеллектуалды басқару жүйелерімен жабдықталған «Цинфоман» кешенді ағынды су тазарту технологиясының мүмкіндіктерін таныстырды. Бұл жүйе энергияны үнемдеу, қашықтан бақылау және қайта пайдаланылатын техникалық су өндіру секілді артықшылықтарымен ерекшеленеді. Сонымен қатар жасыл экономика мен төмен көміртекті даму бағытындағы халықаралық ынтымақтастық мәселелері кеңінен талқыланды. Hubei Communications Investment Group соңғы жылдары сутегі энергетикасы, электр көліктеріне арналған зарядтау желілері және экологиялық көлік инфрақұрылымын дамытуға ірі инвестициялар бағыттап келеді. Компания басшылығы «Бір белдеу – бір жол» бастамасы аясында Орталық Азия елдерімен серіктестікті кеңейтуге ерекше қызығушылық танытатынын жеткізді. Осы ретте Түркістан облысы сутегі энергетикасы, жаңартылатын энергия көздері және көлік-логистикалық инфрақұрылым бағыттарындағы бірлескен жобаларды іске асыру үшін қолайлы алаң ретінде қарастырылуда.

Облыста күн энергетикасын дамытуға ерекше көңіл бөлінуде. Климаттық жағдайдың қолайлылығы мен күн сәулесінің мол болуы жаңартылатын энергия көздерін дамытуға мүмкіндік беріп отыр. Осы бағытта күн электр станцияларын салу және олардың қуаттылығын арттыру арқылы өңірдің энергетикалық қауіпсіздігін қамтамасыз етуге, дәстүрлі энергия көздеріне тәуелділікті азайтуға басымдық берілуде. Бұл өз кезегінде көмірқышқыл газының атмосфераға бөлінуін азайтып, қоршаған ортаға зиянды әсерді төмендетуге ықпал етеді.

Су ресурстарын тиімді пайдалану мәселесі де «жасыл экономика» саясатының маңызды бағыттарының бірі болып табылады. Әсіресе, су тапшылығы мәселесі өзекті болып отырған өңірде су үнемдеу технологияларын енгізу, каналдарды бетондау, тамшылатып және жаңбырлатып суару жүйелерін кеңінен пайдалану жұмыстары қарқынды жүргізілуде. Заманауи агротехнологияларды енгізу арқылы суды тиімді пайдалану көрсеткіші артып, ауыл шаруашылығы өнімдерінің өнімділігі жоғарылауда.

Сонымен қатар, ауыл шаруашылығы саласында экологиялық таза өнім өндіру, ресурс үнемдейтін технологияларды енгізу және жер ресурстарын ұтымды пайдалану бағытындағы жұмыстарға басымдық берілуде. Интенсивті бақтар мен заманауи жылыжай кешендерінің санын арттыру, цифрлық агротехнологияларды пайдалану және су үнемдеу әдістерін қолдану арқылы агроөнеркәсіп кешенінің тиімділігі артып келеді.

Өңірде көгалдандыру және экологиялық ахуалды жақсарту бағытында да ауқымды жұмыстар атқарылуда. Елді мекендерді абаттандыру, жасыл желектердің көлемін ұлғайту, ағаш көшеттерін отырғызу және қоршаған ортаны қорғауға бағытталған іс-шаралар тұрақты түрде жүзеге асырылуда. Бұл жұмыстар климаттың өзгеруіне бейімделуге, ауаның сапасын жақсартуға және қолайлы экологиялық орта қалыптастыруға мүмкіндік береді.

Қалдықтарды басқару жүйесін жетілдіру, қайта өңдеу саласын дамыту және экологиялық мәдениетті қалыптастыру мәселелеріне де ерекше назар аударылуда. Қатты тұрмыстық қалдықтарды сұрыптау, қайта өңдеу үлесін арттыру және табиғи ресурстарды ұтымды пайдалану бағытындағы жобалар өңірдің экологиялық тұрақтылығын қамтамасыз етуге бағытталған.

Инновациялық технологияларды енгізу де «жасыл экономика» тұжырымдамасының маңызды бөлігі болып саналады. Өңірде энергия үнемдейтін технологияларды қолдану, өндіріс орындарында экологиялық стандарттарды енгізу және ресурстарды тиімді пайдалануға негізделген заманауи шешімдерді пайдалану жұмыстары жүргізілуде. Бұл бағыттағы жобалар өндіріс тиімділігін арттырумен қатар қоршаған ортаға түсетін жүктемені азайтуға мүмкіндік береді.

Жалпы, Түркістан облысында «жасыл экономика» қағидаттарын дамыту өңірдің тұрақты дамуының негізгі факторларының біріне айналып отыр. Жаңартылатын энергия көздерін пайдалану, су ресурстарын тиімді басқару, экологиялық қауіпсіздікті қамтамасыз ету және инновациялық технологияларды енгізу арқылы өңірдің экономикалық әлеуеті артып, халықтың өмір сүру сапасы жақсарып келеді. Алдағы уақытта «жасыл» жобаларды кеңейту, экологиялық таза өндірістерді дамыту және табиғи ресурстарды тиімді пайдалану арқылы Түркістан облысын тұрақты даму қағидаттарына негізделген экологиялық жауапты өңір ретінде қалыптастыру бағытындағы жұмыстар жалғасын табатын болады.

Кездесу қорытындысында тараптар инвестициялық ынтымақтастықты кеңейту, жасыл индустрия жобаларын бірлесіп іске асыру және екі өңір арасындағы ұзақ мерзімді әріптестікті дамыту мәселелері бойынша жұмысты жалғастыруға уағдаласты. Бұл кездесу Қазақстан мен Қытай арасындағы стратегиялық әріптестіктің нығаюына, сондай-ақ Түркістан облысына озық технологиялар мен ірі инвестицияларды тартуға бағытталған маңызды қадамдардың бірі болды.