Түркістан облысы – еліміздің ауыл шаруашылығы қарқынды дамыған өңірлерінің бірі. Облыста егін және мал шаруашылығының дамуына мемлекеттік қолдау көрсетіліп, агроөнеркәсіп кешеніне инновациялық технологияларды енгізу жұмыстары жүйелі түрде жүргізілуде. Соңғы жылдары ауыл шаруашылығын цифрландыруға ерекше көңіл бөлініп, дәлме-дәл егіншілік элементтері, геоақпараттық жүйелер, спутниктік мониторинг және агродрон технологиялары кеңінен қолданыла бастады. Бұл тәсілдер өндіріс шығындарын азайтып, өнімділікті арттыруға және табиғи ресурстарды тиімді пайдалануға мүмкіндік береді.
Агродрон – ауыл шаруашылығы алқаптарын әуеден бақылауға, егістіктердің жай-күйін бағалауға, тыңайтқыштар мен өсімдіктерді қорғау құралдарын дәл мөлшерде шашуға арналған ұшқышсыз ұшу аппараты. Заманауи дрондар GPS навигациясы, автоматты маршрут құру жүйесі, жоғары дәлдіктегі камералар және түрлі датчиктермен жабдықталған. Олардың көмегімен фермерлер егістік алқаптарының жағдайын нақты уақыт режимінде бақылап, агротехникалық шешімдерді дер кезінде қабылдай алады.
Бүгінде «BNK Group» америкалық «Nelson Irrigation» компаниясымен бірлесіп, «BNK IRRIGATION» сауда белгісімен айналмалы және фронтальды жаңбырлатып суару құрылғыларын құрастырады. Сонымен қатар, кәсіпорында ауыл шаруашылығы техникалары құрастырылып, агродрондар дайындалады.
Түркістан облысында жоғары технологиялық өндірістерді дамыту және цифрландыру бағытындағы маңызды жобалардың бірі – «BNK Group» кәсіпорнында агродрондарды құрастыру және өндіру. Бұл жоба өңірдің өндірістік әлеуетін арттырып қана қоймай, ауыл шаруашылығына заманауи цифрлық шешімдерді енгізуге мүмкіндік беруде. Кәсіпорында шығарылатын агродрондар дәлме-дәл егіншілік технологияларын дамытуға арналған. Олар егістік алқаптарын әуеден бақылау, өсімдіктердің жай-күйін талдау, минералды тыңайтқыштар мен өсімдіктерді қорғау құралдарын белгіленген мөлшерде шашу жұмыстарын автоматтандыруға мүмкіндік береді. GPS навигациясы мен автоматты ұшу бағдарламаларының арқасында дрондар алдын ала белгіленген маршрут бойынша жоғары дәлдікпен жұмыс істейді. Агродрондарды қолдану ауыл шаруашылығын цифрландырудың маңызды элементіне айналып келеді. Ұшқышсыз аппараттар арқылы жиналған мәліметтер электрондық карталармен, спутниктік мониторинг жүйелерімен және геоақпараттық платформалармен біріктіріліп, фермерлерге егістіктің нақты жағдайын бағалауға жағдай жасайды. Бұл агротехникалық шешімдерді деректерге сүйене отырып қабылдауға мүмкіндік береді.
Түркістан облысында агродрондарды пайдалану суармалы егіншілікті дамытуда ерекше маңызға ие. Өңірде мақта, жүгері, бақша, көкөніс, жеміс-жидек және мал азығы дақылдары кең көлемде өсіріледі. Ауқымды егістік алқаптарын дәстүрлі әдіспен өңдеу көп уақыт пен шығынды талап етеді. Ал агродрондар қысқа уақыт ішінде үлкен аумақты қамтып, өсімдіктерді қорғау препараттарын немесе сұйық тыңайтқыштарды біркелкі шашуға мүмкіндік береді. Дрондардың көмегімен егістіктерге мониторинг жүргізу де жеңілдейді. Арнайы камералар мен мультиспектрлі сенсорлар арқылы өсімдіктердің даму деңгейі, топырақтағы ылғал мөлшері, ауру немесе зиянкес таралған аумақтар анықталады. Бұл ақпараттың негізінде шаруашылықтар нақты проблемалы учаскелерге ғана өңдеу жұмыстарын жүргізіп, артық шығындардың алдын алады. Нәтижесінде тыңайтқыштар мен химиялық препараттардың шығыны азайып, өнімнің өзіндік құны төмендейді. Түркістан облысында ауыл шаруашылығы саласын цифрландыру бағытында аграрлық кәсіпорындар мен фермерлердің заманауи техникаларға қызығушылығы артып келеді. Агродрондарды пайдалану бойынша тәжірибе алмасу, оқыту семинарлары мен практикалық көрсетілімдер ұйымдастырылып, жаңа технологиялардың артықшылықтары түсіндірілуде. Бұл ауыл шаруашылығы өндірушілерінің цифрлық шешімдерді қолдану деңгейін арттыруға ықпал етеді.
Дрондардың көмегімен тыңайтқыштар мен химиялық препараттарды нақты мөлшерде пайдалану мүмкіндігі шығындарды азайтып, табиғи ресурстарды тиімді қолдануға жағдай жасайды. Сонымен қатар үлкен егістік алқаптарын қысқа уақыт ішінде өңдеу еңбек өнімділігін арттырып, ауыл шаруашылығы жұмыстарын автоматтандыру деңгейін көтереді.
«BNK Group» өндірісі өңірдегі инновациялық өндірістердің қалыптасуына серпін беріп отыр. Кәсіпорын цифрлық технологияларды игерген инженерлер мен техникалық мамандарға сұранысты арттырып, жоғары технологиялық өндіріс мәдениетінің дамуына ықпал етуде. Бұл өз кезегінде Түркістан облысының индустриялық-инновациялық әлеуетін күшейтіп, өңір экономикасын әртараптандыруға мүмкіндік береді. Сонымен қатар «Avatar Agricultural Technology Development» ЖШС жүзеге асырып жатқан агродрондар өндірісі де ұсынылды. Жоба аясында жылына 600 дана ауыл шаруашылығына арналған дрон шығару жоспарланған. Қазіргі уақытта өндірістік алаң дайындалып, қажетті құрал-жабдықтар толық орнатылған. Алғашқы сынамалық үлгілер әзірленген. Қазіргі кезде жобаны толық іске қосу үшін азаматтық авиация саласындағы тиісті рұқсат құжаттарын рәсімдеу жұмыстары жүргізілуде.
Leave a reply
