ОТБАСЫ ТЫНЫШТЫҒЫ – ҚОҒАМ ТҰРАҚТЫЛЫҒЫНЫҢ НЕГІЗІ

Созақ ауданында отбасы институтын нығайту, тұрмыстық зорлық-зомбылықтың алдын алу және тұрғындардың құқықтық сауаттылығын арттыру бағытында жүйелі жұмыстар жүргізілуде. Осы мақсатта ағымдағы жылдың 15–20 маусымы аралығында аудан көлемінде өтіп жатқан «Тұрмыс» жедел-профилактикалық іс-шарасы аясында аудандық полиция бөлімі мен «Отбасын қолдау орталығы» коммуналдық мемлекеттік мекемесінің бірлесуімен «Ашық есік күні» ұйымдастырылды.

Аталған шараның басты мақсаты – отбасындағы жанжалдардың алдын алу, тұрмыстық зорлық-зомбылыққа жол бермеу, азаматтарға өз құқықтары мен заң талаптарын түсіндіру, сондай-ақ қиын жағдайға тап болған жандарға тиісті көмек түрлерін көрсету.

«Ашық есік күніне» аудандық полиция бөлімінің қоғамдық қауіпсіздік бөлімшесінің отбасылық-тұрмыстық зорлық-зомбылыққа қарсы күрес және әйелдерді зорлық-зомбылықтан қорғау жөніндегі инспекторы Айжан Манапова, отбасылық-тұрмыстық зорлық-зомбылыққа қарсы күрес тобының аға инспекторы Жанерке Аленқызы Жұматова, сондай-ақ «Отбасын қолдау орталығы» КММ-нің психологі Құралай Ыдырысова, әлеуметтік қызметкер Мақпал Маметханова және БАҚ-пен және жұртшылықпен жұмыс жөніндегі маман Айдана Тұрсынбай қатысты.

Шара барысында мамандар тұрғындарға тұрмыстық зорлық-зомбылықтың түрлері мен оның алдын алу жолдары жөнінде кеңінен түсіндірді. Сонымен қатар қолданыстағы заңнама талаптары, азаматтардың құқықтары мен міндеттері, отбасылық жанжал туындаған жағдайда қандай мекемелерге жүгінуге болатыны туралы ақпараттар берілді.

Кездесудің ерекшелігі – оның ашық форматта ұйымдастырылуында. Аудан тұрғындары өздерін толғандырған мәселелерін мамандарға тікелей қойып, нақты жауаптар алды. Полиция қызметкерлері құқықтық тұрғыдан түсіндірме берсе, психолог пен әлеуметтік қызметкер отбасындағы түрлі мәселелерге байланысты психологиялық және әлеуметтік кеңестер ұсынды.

Отбасындағы татулық пен өзара түсіністік – қоғамдағы тұрақтылықтың маңызды негіздерінің бірі. Сондықтан тұрмыстық зорлық-зомбылықтың алдын алу тек құқық қорғау органдарының ғана емес, барша қоғамның ортақ міндеті болып саналады. Әсіресе жанжалдың алғашқы белгілерін дер кезінде байқап, мәселені ушықтырмай шешу, отбасындағы әрбір адамның құқығы мен ар-намысын құрметтеу – зорлық-зомбылықтың алдын алудың тиімді жолдарының бірі.

Мамандардың айтуынша, тұрмыстық сипаттағы келеңсіз жағдайлар көбіне отбасындағы өзара түсіністіктің аздығынан, мәселелерді ашық талқылай алмаудан және құқықтық сауаттың жеткіліксіздігінен туындауы мүмкін. Осы ретте халық арасында түсіндіру жұмыстарын жүргізіп, азаматтарға қажетті ақпаратты қолжетімді түрде жеткізудің маңызы зор.

«Ашық есік күні» барысында тұрғындар тек құқықтық мәселелер бойынша ғана емес, отбасылық қарым-қатынас, бала тәрбиесі, әлеуметтік қолдау және психологиялық көмек көрсету бағыттары бойынша да кеңес алды. Бұл өз кезегінде тұрғындардың мамандармен еркін пікір алмасуына және көкейде жүрген сауалдарына жауап табуына мүмкіндік берді.

Сонымен қатар іс-шара аясында отбасы құндылықтарын дәріптеу, ерлі-зайыптылар арасындағы сыйластық пен жауапкершілікті арттыру, балалардың қауіпсіз ортасын қалыптастыру мәселелеріне де ерекше назар аударылды. Өйткені берекелі отбасы – ұрпақ тәрбиесінің алтын бесігі. Ал отбасындағы жайлы психологиялық ахуал баланың болашағына да тікелей әсер етеді.

Мұндай профилактикалық іс-шаралардың тағы бір маңызды бағыты – тұрғындардың көмек сұраудан тартынбауына жағдай жасау. Қиын жағдайға тап болған азаматтар өз мәселесін жалғыз шешуге тырыспай, тиісті мамандардың көмегіне жүгінгені жөн. Полиция қызметкерлері, психологтер, әлеуметтік қызметкерлер мен отбасы мәселелері бойынша мамандар азаматтарға заң аясында қолдау көрсетуге дайын.

Іс-шара соңында қатысушыларға тұрмыстық зорлық-зомбылықтың алдын алу, құқықтық сауаттылықты арттыру және отбасындағы қолайлы психологиялық ортаны қалыптастыруға қатысты пайдалы ақпараттар берілді.

Созақ ауданында ұйымдастырылған «Ашық есік күні» – тұрғындар мен сала мамандары арасындағы байланысты нығайтып, отбасылық мәселелердің алдын алуға бағытталған маңызды шаралардың бірі болды.

Отбасы – әр адамның қорғаны мен тірегі. Сондықтан оның берекесі мен тыныштығын сақтау, өзара сыйластық пен түсіністікті қалыптастыру – баршаға ортақ жауапкершілік. Ал зорлық-зомбылықсыз, өзара құрмет пен сенімге негізделген отбасы – қауіпсіз әрі тұрақты қоғамның берік негізі.