АБАЙ ҚҰНАНБАЕВТЫҢ МЕРЕКЕСІ ҰЛЫҚТАЛДЫ

Бүгінгі Шымкенттің шуақты таңы әсем әуезді әнмен атты. Таңмен таласа өңірлік зиялы қауым, құрметті азаматтар, қала тұрғындары «Абай» саябағына гүл шоқтарын көтере келді. Неге десеңіз, 176 жыл бұрын, дәл осы күні қазақтың рухани кемеңгері, ойшылы, білім мен бостандық жолындағы қажымас күрескері – Абай Құнанбайұлы дүниеге келген. Қазақ әдебиетінің негізін қалаушы, артына өшпейтұғын із қалдырған кемеңгер Абайдың туған күнін биыл шымкенттіктер осылай атап өтуге бел буды. Әрине карантин талаптарын сақтау басты назарда.

Ел Тәуелсіздігінің 30 жылдығына орайластырылып ұйымдастырылған салтанатты шараға қалалық мәслихаттың хатшысы Бахадыр Нарымбетов, қалалық Мәдениет, тілдерді дамыту және архивтер басқармасының басшысы Ханзада Есенова, ғалым, филолог Ақжол Қалшабек және басқалар қатысты.

— Ұлы философ, ақын, қазақ әдебиетінің негізін қалаушы ретінде өміршең құнды мұралар қалдырды. Қай шығармасын алсақ та, халқын білім-ғылым іздеуге, қоғамды өркендетуге шақырған әдеби еңбектері, адамзатты сүю мен ой тазалығы туралы пікірлері өзектілігін жоймайды. Ғылым таппай мақтанба өлеңінің өзі қандай?! Бала кезімізде оның мәнін, құндылығын дұрыс түсінбедік. Жаттап айтқанымыз есте. 9-10 сынып оқығанда ғана терең мағынасын білдік. Сондықтан Абай мұрасы әлі де зерттелу керек, — деді Бахадыр Нарымбетов.

Шымкент қаласының қақ ортасында орналасқан Абай саябағында бүгін ерекше атмосфера. Таңнан бастап Абай Құнанбайұлының ескерткішіне гүл шоқтары қойылып, жанды дауыста ұлы ақынның әуезді әндерін келушілер қосыла шырқауда.

Шараға қатысушылардың қатарында қалалық мәслихат депутаттары, зиялы қауым, жас ақындар, кітапхана және Полиция департаментінің қызметкерлері де болды.