ТҮРКІСТАН: «АУЫЛ – ЕЛ БЕСІГІ» БАҒДАРЛАМАСЫ АЯСЫНДА ЖҮЙЕЛІ ЖҰМЫСТАР ЖҮРГІЗІЛУДЕ

Биыл Түркістан облысындағы 142 ауылда 140 жоба жоспарланып, оған тиісті қаржы қаралған. Жобалар қатарына мектептер мен спорт, мәдениет нысандарына жөндеу мен салу, су және электр жүйелерін жаңарту, ішкі көшелерді реттеу кіреді. «Ауыл – Ел бесігі» жобасы Түркістан облысында ауыл тұрғындарының тұрмыс сапасын жақсартып, ауылдық мәдени және спорттық инфрақұрылымды жаңғыртуға бағытталған. Осы жоба аясында ауылдарда мектеп, мәдениет, спорт, су‑электр‑газ, жол секілді маңызды нысандар салынды немесе күрделі жөндеуден өтті. Бұл әділеттілікті жақсарту, тұрғындардың теңдестірілген дамуы мен өмірін жақсарту саясатымен үн қатысқан маңызды мемлекеттік бастама.

Биыл Түлкібас ауданында «Ауыл – Ел бесігі» бағдарламасы аясында үш ауылдық окруктегі бес ауылда жалпы 18 көшеге жөндеу жұмыстары жүргізілуде. Атап айтқанда, жол жөндеу жұмыстарымен Майлыкент, Машат, Ақбиік ауылдық округтеріндегі Т.Рысқұлов, Бақыбек, Ақбиік, Машат, Құлан елді мекендері қамтылмақ.

Жұмыс барысы бақылауда. Аудан әкімі Асқар Естібаев Майлыкент ауылдық округіне қарасты Т.Рысқұлов ауылындағы орташа жөндеу жұмыстары жүргізіліп жатқан Бекбосынов көшесінің құрылыс барысымен танысты. Бұл көше – ауыл ішіндегі негізгі жолдардың бірі. Ұзындығы 4,5 шақырымды құрайды. Жол жөндеу жұмыстарын «Мақтааралдорстрой» ЖШС жүзеге асыруда. Мердігер мекеменің мәліметінше, бүгінде құрылыс жұмыстары 80 пайызға аяқталған. Жоспарға сәйкес, жол маусым айының соңына дейін толық пайдалануға беріледі.

Аудан әкімі мердігер компанияның өкілдерімен кездесіп, жұмыстың сапасы мен мерзіміне баса назар аудару қажеттігін атап өтті. Сонымен қатар жол құрылысы кезінде тұрғындарға қолайсыздық туғызбау үшін барлық қауіпсіздік талаптарын қатаң сақтау жөнінде нақты тапсырмалар берді.

Жол жөндеу жұмыстары ауыл тұрғындарының жүріп-тұруына қолайлы жағдай жасап қана қоймай, көлік қатынасын да едәуір жеңілдетпек.

Түркістан облысында әлеуметтік инфрақұрылым мен ауылдық даму қарқыны артуда. Яғни биыл— Түркістан облысында соңғы жылдары халықтың өмір сапасын арттыруға бағытталған жүйелі жұмыстар нәтижесінде әлеуметтік инфрақұрылым едәуір жаңарып, ауылдық жерлерге ерекше көңіл бөлініп отыр. Білім беру, медицина, спорт, мәдениет салалары мен «Ауыл – Ел бесігі» бағдарламасы аясында жүздеген жоба іске асты.

Түркістан облысында 2025 жылы «Ауыл – Ел бесігі» жобасы аясында 142 елді мекенде 140 жобаны (54 – өтпелі, 86 – жаңа жобалар) іске асыруға 21,8 млрд. теңге бөлінді. Атап айтқанда, осы қаржы арқылы 7 мектеп күрделі жөндеуден өтсе, 17 спорт нысанының құрылысы және 1 спорт мектебінің күрделі жөндеу жұмыстары жүреді. 10 мәдениет нысаны салынып, 6 нысан күрделі жөндеуден өтеді. Сонымен бірге 2 ауыз су нысаны күрделі жөндеуден өтіп, 7 электр қуатымен жабдықтау нысанының құрылысы жүреді. 90 жоба ішкі көшелерді орташа жөндеуге бағытталған. Аталған жоба аясындағы жұмыстар облыс әкімі аппаратының апталық мәжілісінде талқыланды. Өңір басшысы Нұралхан Көшеров жауаптыларға міндеттерін сапалы атқаруды тапсырды.

– «Ауыл – Ел бесігі» жобасы аясындағы жұмыстарды уақтылы әрі сапалы аяқтауды тапсырамын. Жергілікті тұрғындарды жұмыспен қамту керек. Әрбір жоба зерделеніп, қадағаланады. Жалпы облыс аумағындағы құрылыс нысандарының бәрі бақылауда тұр. Облыстық басқарма басшылары мен аудан, қала әкімдері жұмысты ширатып, сапалы атқарсын. Аймақты дамыту жоспары, индикаторлардың орындалуы бойынша арнайы зерделеу жүргізіледі, – деді Нұралхан Көшеров.

Мәжілісте өңірді ауыз сумен қамту және «Жайлы мектеп» жобасын жүзеге асыру мәселелері де талқыланды. Түркістан облысындағы қалалар ауыз сумен толық қамтылса, ауылдардың қамту көрсеткіші жыл сайын ұлғайып келеді. Арыс, Шардара, Ленгір, Сарыағаш қалаларындағы ауыз су жүйелерін реттеу мәселесі айтылып, тиісті ұсыныстар берілді. Ауыз сумен қамту бойынша облыста 63 жоба жүзеге асырылуда. Оның 7-еуі қалада болса, 56 жоба ауылдарда жүзеге аспақ. Биыл 36 жоба жүзеге асып, 30 елді мекен сапалы ауыз сумен қамтылса, 7 елді мекеннің су құбырлары жаңартылады. 2 елді мекенге су құбырлары салынады.

Облыста «Жайлы мектеп» жобасы арқылы 29 мектептің құрылысы жоспарланса, бүгінде 13 мектеп тапсырылған. 9 мектепте оқу процесі басталған. Биыл қалған 16 мектеп тапсырылады деп күтіліп отыр. Білім ұяларының құрылысы облыс әкімінің қатаң бақылауына алынған. Мектептерді білікті басшылармен және ұстаздармен қамту жұмысы да назарда тұр.

Бұдан бөлек, облыста «Жайлы мектеп» жобасы аясында 29 жаңа мектептің құрылысы жоспарланған. Бүгінгі таңда он үш білім ошағы пайдалануға берілді, тоғыз мектепте оқыту процесі басталып кеткен. Қалған он алты мектептің құрылысы биыл аяқталады деп күтілуде. Бұл білім ошақтарының сапалы әрі заманауи деңгейде бой көтеруі – облыс әкімінің тікелей бақылауында. Сонымен қатар, жаңа мектептерді кәсіби басшылармен және тәжірибелі ұстаздармен қамту мәселесі де басты назарда.

Ауылдың тынысын ашып, елдің келешегін кемелдендіруге арналған бұл жобалар – тек құрылыс пен жөндеу емес, халықтың ертеңге деген сенімін оятатын нақты қадамдар. Елді мекендер көркейсе – ел рухы көтеріледі. Ал ауыл – елдің берік бесігі.