ТҮРКІСТАН ОБЛЫСЫНДА ЦИФРЛАНДЫРУ МЕН ЖАСАНДЫ ИНТЕЛЛЕКТ ТЕХНОЛОГИЯЛАРЫН ЕНГІЗУ ЖҰМЫСТАРЫ ҚАРҚЫНДЫ ЖҮРГІЗІЛІП ЖАТЫР

Түркістан облысында цифрлық технологияларды дамыту, инновациялық жобаларды іске асыру және жасанды интеллект мүмкіндіктерін мемлекеттік басқару мен экономиканың түрлі салаларына енгізу бағытындағы жұмыстар жүйелі түрде жүргізілуде. Бүгінде цифрландыру өңірдің әлеуметтік-экономикалық дамуының маңызды драйверлерінің біріне айналып, мемлекеттік қызметтердің сапасын арттыруға, бизнес үдерістерін жеңілдетуге және инвестициялық тартымдылықты күшейтуге ықпал етуде.

Мемлекет басшысының цифрлық трансформацияны жеделдету жөніндегі тапсырмалары аясында Түркістан облысында мемлекеттік қызметтерді электронды форматқа көшіру, деректерді автоматтандыру және заманауи цифрлық шешімдерді енгізу бағытында нақты жұмыстар атқарылуда. Нәтижесінде тұрғындар көптеген мемлекеттік қызметтерді онлайн форматта алып, уақыт пен шығынды үнемдеуге мүмкіндік алды.

Өңірде «Smart City» қағидаттарын енгізу арқылы қалалық инфрақұрылымды басқарудың тиімділігі артып келеді. Бейнебақылау жүйелері, интеллектуалды көлік басқару шешімдері, қоғамдық қауіпсіздікті қамтамасыз етуге арналған цифрлық платформалар және коммуналдық қызметтерді автоматтандыру бағытындағы жобалар кезең-кезеңімен жүзеге асырылуда. Бұл өз кезегінде тұрғындардың өмір сүру сапасын жақсартуға және қалалық ортаны қауіпсіз әрі қолайлы етуге мүмкіндік беруде.

Мемлекет басшысы Түркістанда өткен саммитте жасанды интеллект және цифрлық дамудың өзектілігіне ерекше тоқталған-ды.

«Қазір бүкіл әлем бұрын-соңды болмаған өзгерістермен бетпе-бет келді. Жаңа сын-қатерлер пайда болды. Дүние жүзінде технологиялық бәсеке күшейді, яғни, инновациялық тұрғыдан озық ел болу мақсаты алдыңғы қатарға шықты. Технологиялық даму кез келген мемлекеттегі тұрақтылық пен қауіпсіздік факторына айналды. Бұл – цифрлық трансформацияға дер кезінде бет бұрған елдер көш соңында қалмайды деген сөз.

Сондықтан Түркі кеңесіне мүше мемлекеттер технологиялық жаңғыру үдерісінен тыс қалмауы үшін бірлесе жұмыс істеуі керек деп санаймыз. Жасанды интеллект пен цифрландыру үдерісі түркі әлемінің дамуына жол ашуға тиіс». «Қазақстан цифрлық ел болуды көздеп отыр. Бұл – еліміздің алдында тұрған стратегиялық мақсат. Осы жыл Қазақстанда «Цифрландыру және жасанды интеллект жылы» деп жарияланды.

Астанада Alem.ai жасанды интеллект орталығы ашылды. Сондай-ақ біз екі суперкомпьютерді іске қостық. Келесі қадам – «Деректерді өңдеу орталықтарының алқабын» құру. Бұл жоба аймақ елдеріне жетекші технологиялық компаниялар мен жаһандық цифрлық капиталды тартуға зор мүмкіндік бермек. Біз Қазақстанды аймақтық хаб ретінде дамыту үшін көші-қон үдерісін оңтайландыра бастадық.

Шетелден келген кәсіпкерлерге, инвесторларға, білікті мамандарға арналған «Алтын визаны» енгіздік. Мұндай виза алған адамдар мемлекеттік және қаржылық қызметтерге Қазақстан азаматтарымен тең дәрежеде қол жеткізе алады. Сонымен қатар елімізде Цифрлық кодекс қабылданды, Жасанды интеллект туралы заң күшіне енді деп атап өттіі.

Түркістан қаласында цифрлық технологияларды енгізу арқылы туристік саланы дамытуға да ерекше көңіл бөлінуде. Туристерге арналған ақпараттық жүйелер, онлайн гидтер, электронды навигация және цифрлық сервистер өңірдің туристік әлеуетін арттыруға ықпал етуде. Бұл жобалар Түркістанның халықаралық туристік орталық ретінде дамуына жаңа серпін беруде.

Сонымен қатар облыста өнеркәсіп пен ауыл шаруашылығы салаларын цифрландыру жұмыстары белсенді жүргізілуде. Заманауи агротехнологияларды енгізу, егіс алқаптарын спутниктік бақылау, су ресурстарын тиімді басқару және өнімділік көрсеткіштерін цифрлық мониторингтеу арқылы агроөнеркәсіптік кешеннің тиімділігі артып келеді. Жылыжай шаруашылықтары мен ірі агрокәсіпорындарда автоматтандырылған басқару жүйелерін қолдану өндіріс шығындарын азайтып, өнім сапасын жақсартуға мүмкіндік беруде.

Өнеркәсіп саласында да цифрлық өндіріс элементтері енгізіліп жатыр. Индустриалды аймақтар мен шағын өндірістік парктерде жұмыс істейтін кәсіпорындар автоматтандырылған басқару жүйелерін пайдалану арқылы өндіріс өнімділігін арттыруда. Бұл өңірдің бәсекеге қабілеттілігін күшейтіп, инвесторлар үшін тартымды өндірістік орта қалыптастыруға ықпал етуде.

Жасанды интеллект технологияларын енгізу де Түркістан облысының дамуындағы жаңа кезеңнің бастауы болып отыр. Білім беру саласында цифрлық оқыту платформалары мен интеллектуалды талдау жүйелері қолданылса, денсаулық сақтау мекемелерінде медициналық деректерді өңдеу және диагностикалау үдерістерін жетілдіруге бағытталған технологиялар енгізілуде. Сонымен бірге мемлекеттік басқару жүйесінде деректерді талдау, болжам жасау және шешім қабылдау тиімділігін арттыру үшін жасанды интеллект мүмкіндіктерін пайдалану бағытында жұмыстар жүргізілуде.

Цифрландыру мен инновациялық технологияларды дамыту өңірдің инвестициялық әлеуетіне де оң әсерін тигізуде. Ақпараттық технологиялар саласына қызығушылық танытқан отандық және шетелдік инвесторлар үшін қолайлы жағдай қалыптасып, жаңа цифрлық жобаларды іске асыруға мүмкіндік жасалуда. Бұл өз кезегінде жоғары технологиялық жұмыс орындарын құруға және жастардың заманауи мамандықтарға бейімделуіне жол ашуда.

Жалпы алғанда, Түркістан облысында цифрландыру, инновациялар және жасанды интеллект технологияларын енгізу бағытындағы жұмыстар өңір экономикасының сапалы дамуына, мемлекеттік басқарудың тиімділігін арттыруға және халыққа көрсетілетін қызметтердің сапасын жақсартуға негіз болып отыр. Алдағы уақытта цифрлық инфрақұрылымды одан әрі дамыту, инновациялық экожүйені қалыптастыру және жасанды интеллект негізіндегі жаңа жобаларды іске асыру арқылы Түркістан облысының технологиялық әлеуетін күшейту көзделуде.