Түркістан облысында цифрландыруды дамыту, мемлекеттік қызметтердің қолжетімділігін арттыру және қаржылық технологияларды енгізу бағытында ауқымды жұмыстар атқарылуда. Бүгінде өңірде электрондық үкімет жүйесінің мүмкіндіктерін кеңейту арқылы халыққа қызмет көрсету сапасын жақсарту, мемлекеттік басқарудың тиімділігін арттыру және қаржылық операциялардың ашықтығын қамтамасыз ету мақсатында бірқатар маңызды жобалар жүзеге асырылуда.
Облыста цифрлық трансформация мәселелері тұрақты түрде әкімдік жанындағы аппараттық мәжілістерде, салалық кеңестерде және жұмыс кездесулерінде қаралып келеді. Соңғы жылдары Түркістан өңірі цифрландыру саласында республика көлемінде үздік нәтижелер көрсетіп, «Жылдың цифрлық трансформациясы» номинациясын иеленді.
Цифрландыру саласындағы ірі жобалардың бірі – Smart City («Ақылды қала») жобасы. Бұл бастама аясында Түркістан қаласының инфрақұрылымын заманауи технологиялар арқылы басқару, қоғамдық қауіпсіздікті күшейту және тұрғындарға қолайлы орта қалыптастыру жұмыстары жүргізілуде. Облыс әкімдігінде өткен арнайы жиындарда жобаның орындалу барысы талқыланып, цифрлық шешімдерді аудан және қала орталықтарына кезең-кезеңімен енгізу жөнінде тапсырмалар берілді. Қазіргі таңда Түркістан қаласында «Қауіпсіз аула», «Ақылды аялдама», қоғамдық көлікті GPS арқылы бақылау, бейнебақылау жүйелерін жетілдіру бағытындағы жобалар іске асырылуда.
Электрондық үкіметті дамыту аясында мемлекеттік қызметтердің басым бөлігі онлайн форматқа көшіріліп, тұрғындардың құжаттарды қашықтан алу мүмкіндігі кеңейді. Мемлекеттік органдар арасында деректер алмасу жүйелері жетілдіріліп, қағаз құжат айналымын қысқарту жұмыстары жүргізілуде. Нәтижесінде халықтың мемлекеттік қызметтерді электрондық түрде пайдалану көрсеткіші тұрақты өсіп келеді.
Білім беру саласында қаржылық ашықтықты қамтамасыз ету үшін «Бизнес әмиян» жобасы енгізілуде. Бұл жүйе мектептердегі қаржы қозғалысын бақылауға, бюджет қаражатының тиімді жұмсалуын қадағалауға және ата-аналар үшін төлем процестерін жеңілдетуге мүмкіндік береді. Облыс әкімінің қатысуымен өткен аппараттық мәжілісте аталған жүйені барлық білім беру ұйымдарына кезең-кезеңімен енгізу мәселесі қаралды. Қазіргі таңда жүздеген мектепте жобаны енгізу жұмыстары жалғасуда.
Қаржытех бағытындағы тағы бір маңызды бастама – «Сана» ақпараттық жүйесі. Жоба мектепке дейінгі ұйымдардағы ваучерлік қаржыландырудың ашықтығын қамтамасыз етуге бағытталған. Жүйе арқылы балалардың келуі тіркеліп, мемлекеттік қаржының мақсатты жұмсалуына бақылау жасалады. Бұл бастама облыстағы мемлекеттік және жекеменшік балабақшаларға кезең-кезеңімен енгізілуде.
Өңірде биометриялық технологияларды енгізу жұмыстары да қарқынды жүргізілуде. Мемлекеттік балабақшаларда және колледждерде Face ID жүйесі орнатылып, білім алушылардың қатысуын автоматты түрде тіркеу мүмкіндігі іске асырылуда. Бұл жүйе адами факторды азайтып, қаржыландырудың ашықтығын арттыруға ықпал етеді. Сонымен қатар Face ID технологиялары Smart City жобасының элементтері ретінде қауіпсіздік жүйелерімен де интеграциялануда.
Білім беру ұйымдарындағы қауіпсіздікті арттыру мақсатында «Қауіпсіз мектеп» және «Smart-мектеп» жобалары жүзеге асырылуда. Аталған жобалар аясында мектептерге бейнебақылау камералары, турникеттер, электрондық құлыптар және автоматтандырылған бақылау жүйелері орнатылды. Бұл жұмыстар бірнеше рет өткізілген салалық кеңестер мен цифрландыру жөніндегі отырыстарда қаралып, білім беру мекемелерінің қауіпсіздігін күшейту бойынша нақты міндеттер белгіленді.
Қаржытех саласында қолма-қол ақшасыз төлемдерді дамыту бағытында да жүйелі жұмыстар атқарылуда. Түркістан қаласындағы қоғамдық көліктерге QR-код арқылы төлем жасау жүйесі енгізіліп, автобустар GPS құрылғыларымен жабдықталған. Бұл жоба жолаушылар тасымалы саласының ашықтығын арттырып, цифрлық төлем мәдениетін қалыптастыруға мүмкіндік берді. Сонымен қатар өңірдегі кәсіпкерлер арасында мобильді банкинг, QR-төлем және электронды қаржылық сервистерді пайдалану деңгейі артып келеді.
Коммуналдық шаруашылық саласында жүзеге асырылып жатқан E-SHANYRAQ платформасы тұрғындарға тұрғын үй басқару қызметтерін онлайн бақылауға мүмкіндік береді. Жоба аясында көпқабатты тұрғын үйлердің инженерлік желілері мен коммуналдық көрсеткіштері цифрлық жүйеге қосылып, тұрғындардың өтініштерін электронды түрде қабылдау тетіктері енгізілді.
Жалпы, Түркістан облысында электрондық үкімет пен қаржытех салаларын дамыту бағытында Smart City, Smart-мектеп, Қауіпсіз мектеп, Бизнес әмиян, Сана, Face ID, E-SHANYRAQ және цифрлық төлем жүйелері секілді жобалар табысты жүзеге асырылуда. Бұл бастамалар мемлекеттік қызметтердің тиімділігін арттыруға, бюджет қаражатының ашықтығын қамтамасыз етуге, азаматтарға қолайлы цифрлық орта қалыптастыруға және өңірдің инновациялық әлеуетін нығайтуға мүмкіндік беріп отыр.
Leave a reply
