Шымкент: қала күніне арналған барлық іс-шаралар ашық аспан астында өтеді

Шымкент қаласының 2200 жылдығы және Тәуелсіздіктің 30 жылдығына орай 19 маусым – Қала күні мерекесі тойланады.Осыған орай, Шымкент қаласы мәдениет, тілдерді дамыту және архивтер басқармасының ұйымдастыруымен 15-20 маусым аралығында 52 мерекелік іс-шараны өткізу жоспарланды, деп хабарлайды Aptamedia.kz Шымкент қаласы әкімдігінің баспасөз қызметіне сілтеме жасап.

Барлық іс-шаралар ашық аспан астында өтеді. Шымкенттіктер мен қонақтар үшін қала орталығындағы саябақтарда кітап көрмесі, театрларда тегін қойылымдар, жаңарған, күрделі жөндеуден өткен заманауи кітапханалардың ашылу салтанаты, ашық аспан астындағы түрлі ойын-сауық кештері болады.

Айта кету керек, театр, мәдениет сарайындағы мерекелік қойылымдарға келген көрермендер Ashyq қосымшасы арқылы тексеріліп, ара қашықтықты сақтай отырып тамашалайды. Сонымен бірге іс-шараларды тамашалаушылар антисептик қолданып, бетперде тағуы міндетті.

Ал мерекелік іс-шараларының бастамасы болып бүгін сағат 15.00-де Әл-Фараби қалалық ғылыми-әмбебап кітапханасында жазушы, шежіреші Момбек Әбдіәкімұлының «Шымкент қаласының тариха» атты жаңа кітабының тұсауы кесіледі.