ТҮРКІСТАНДА БИЗНЕСТІ ҚОЛДАУ БАҒДАРЛАМАЛАРЫ ІСКЕ АСЫРЫЛУДА

Түркістан облысында инвестиция тарту және жаңа жобаларды іске асыру жұмыстары алдағы уақытта да жалғасады. Бұл өңірдің экономикалық өсімін қамтамасыз етіп, жаңа жұмыс орындарын ашу мен кәсіпкерлікті дамытуға кең жол ашады.

Биыл Түркістан облысында инвестицияларды тарту индикаторы 1 трлн 783,9 млрд теңге көлемінде бекітілген. Осы жылдың 5 айының қорытындысымен 614,2 млрд теңге инвестиция бағытталып, өсім 150,5 %-ды құрады. Ал 2025 жылдың қорытындысымен тікелей шетелдік инвестициялар көлемі 1 млрд 998,2 млн АҚШ долларын құрап, жылдық жоспар 4 есе жоғары орындалды. Бұл көрсеткіш бойынша Түркістан облысы елімізде 1 орында. 2026 жылға тікелей шетелдік инвестицияларды тарту жоспары 499 млн АҚШ долларын құрап отыр. Бұл туралы облыс әкімі Нұралхан Көшеровтің төрағалығымен өткен аппарат мәжілісінде айтылды. Нұралхан Көшеров жауапты тұлғаларға инвесторларды тарту және сүйемелдеу жұмыстарын сапалы ұйымдастырып, кәсіпкерлерге қолайлы жағдай жасауды тапсырды. Әрбір жобаны тұрақты бақылауында ұстайтынын жеткізді. Түркістан облысының өнеркәсіп және индустриалды-инновациялық даму басқармасының басшысы Нұрлыбек Исаев ірі инвестициялық жобалардың ағымдағы жағдайы туралы баяндады. Облыс көлемінде жүзеге асыру жоспарланған инвестициялық жобалардың тиімділігін арттыру мақсатында инвестициялық жобалар пулы қайта қаралып, өзектендіру жұмыстары жүргізілді. Нәтижесінде 2026-2029 жылдар аралығында жүзеге асырылатын 2,8 трлн теңгеге 122 инвестициялық жобаның пулы қалыптастырылды. Бұл жобалар арқылы 17 820 жұмыс орнын құру көзделуде. Оның ішінде, шетелдік капиталдың қатысуымен жалпы құны 608,9 млрд теңгеге 30 инвестициялық жоба іске асырылуда. Жобалар толық іске қосылғанда 7 799 жұмыс орны құрылмақ. Биыл 369,4 млрд теңгеге 67 инвестициялық жоба іріктелген. 5 айдың қорытындысымен жалпы құны 42,4 млрд теңгеге 11 инвестициялық жоба іске қосылды. Нәтижесінде 407 жұмыс орны ашылды. Одан бөлек, бірқатар ірі инвестициялық жобалар іске асырылуда. Олардың қатарында, Созақ ауданында күкірт қышқылын өндіретін, аффинаж зауыттарының құрылысы мен уран өңдеу кешенінің ІІ кезеңі іске асырылуда. Ал «Южная» өнеркәсіптік алаңы жобасы іске қосылды. Түркістанда тоқыма фабрикасының, бояу-әрлеу фабрикасының, үйге арналған текстиль бұйымдары фабрикасының құрылысы қарқын алды. Отырар ауданында 2 мақта өңдеу зауыты салынуда. Одан бөлек, 16 роторлы (айналмалы) иіру желісімен жабдықталған тоқыма зауыты, Мақтаарал ауданында мақта және өсімдік майын өңдеу зауыты, Ордабасы ауданында ірі қара мал сүйегінен май және желатин компоненттерін өңдейтін зауыт бой көтеруде. Сайрам ауданында ет комбинаты мен 10 000 басқа арналған бордақылау алаңының, арнайы техника құрастару зауытының, сүт өнімдерін өндіретін зауыттың және Аустралия әдісімен мал базарының құрылысы жүргізіліп жатыр. Сауранда сүт өнімдерін өндіретін зауыт, ет комбинаты, құрама жем шығару, тері өңдеу цехтары және бордақылау алаңы, Арыста 50 мың басқа арналған ІҚМ бордақылау кешені, Бәйдібек ауданында жұмыртқа бағытындағы құс фабрикасы мен құрамажем өндіру зауыты салынып жатыр.

Түркістан облысында инвестициялық жобаларды жүзеге асыру жұмыстары қарқын алып, өңір экономикасына нақты нәтижелер беруде. Соңғы кезеңде облыс аумағында жалпы 11 инвестициялық жоба іске қосылып, нәтижесінде 407 жаңа жұмыс орны ашылды.

Аталған жобалар өнеркәсіп, ауыл шаруашылығы, қайта өңдеу және қызмет көрсету салаларын қамтиды. Бұл өңірдің экономикалық құрылымын әртараптандыруға, өндірістік қуаттарды арттыруға және ішкі нарықты отандық өніммен қамтамасыз етуге мүмкіндік беріп отыр.

Инвестициялық жобалардың іске қосылуы жаңа өндіріс орындарының пайда болуына және кәсіпкерлік белсенділіктің артуына ықпал етті. Әрбір жоба аясында жергілікті тұрғындар жұмыспен қамтылып, тұрақты табыс көзін қалыптастыруға жағдай жасалды. Бұл өз кезегінде халықтың әлеуметтік әл-ауқатын жақсартуға оң әсерін тигізуде.

Сонымен қатар инвестициялық жобалар заманауи технологияларды енгізуге және өндіріс тиімділігін арттыруға бағытталған. Бұл кәсіпорындардың бәсекеге қабілеттілігін күшейтіп, өнім сапасын жақсартуға мүмкіндік береді.

Бүгінде облыста кәсіпкерлерге жан-жақты қолдау көрсету тетіктері қалыптасқан. Атап айтқанда, кәсіпкерлік жобаларды сүйемелдеу, жеңілдетілген қаржыландыру, гранттар беру және инфрақұрылыммен қамтамасыз ету бағытындағы бағдарламалар кеңінен іске асырылуда. Бұл кәсіпкерлердің бизнесін бастауына және оны тұрақты дамытуына қолайлы жағдай жасайды.

Кәсіпкерлікті дамытуда қаржылай қолдау құралдарының маңызы ерекше. Жеңілдетілген несиелер, мемлекеттік субсидиялар және даму институттарының бағдарламалары арқылы жаңа жобаларды іске асыруға мүмкіндік берілуде. Бұл өз кезегінде өндіріс орындарының көбеюіне және экономикалық белсенділіктің артуына ықпал етеді. Түркістан облысында кәсіпкерлікті қолдау және шағын мен орта бизнесті дамыту мақсатында «Өрлеу» және «Іскер аймақ» бағдарламалары жүзеге асырылуда. Бұл бағдарламалар өңірдегі экономикалық белсенділікті арттыруға, жаңа жұмыс орындарын ашуға және кәсіпкерлік бастамаларды қолдауға бағытталған.

«Іскер аймақ» бағдарламасы – кәсіпкерлерге өндірістік алаңдар мен инфрақұрылымы дайын аумақтарда жұмыс істеуге мүмкіндік беретін жоба. Бағдарлама шеңберінде шағын өндіріс орындарын ашу, цехтар құру және жаңа кәсіпорындарды орналастыруға қолайлы жағдай жасалады. Бұл кәсіпкерлердің бастапқы шығындарын азайтып, өндірісті тез іске қосуға мүмкіндік береді.

Аталған бағдарламалардың негізгі мақсаты – өңірде кәсіпкерлік экожүйені дамыту, инвестиция тарту және жергілікті өнім өндіруді арттыру. Сонымен қатар бұл бастамалар импортты алмастыруға, экспорттық әлеуетті күшейтуге және халықты тұрақты жұмыспен қамтуға бағытталған.