Өңір соңғы жылдары әлеуметтік-экономикалық даму қарқыны жоғары өңірлердің біріне айналды. Мемлекет басшысы айқындаған экономиканы әртараптандыру, өндірісті дамыту, инвестиция тарту және халықтың әл-ауқатын арттыру бағытындағы тапсырмалар өңірде кезең-кезеңімен жүзеге асырылып келеді. Бүгінде облыс агроөнеркәсіп, өнеркәсіп, туризм, құрылыс, логистика және шағын және орта бизнес салаларын қатар дамытып, еліміздің оңтүстігіндегі ірі экономикалық орталықтардың біріне айналуда.
Түркістан облысы Орталық Азия елдерімен шектесіп, халықаралық көлік дәліздерінің бойында орналасқан. Бұл экспорттық әлеуетті арттыруға, шетелдік инвесторларды тартуға және халықаралық экономикалық ынтымақтастықты кеңейтуге мүмкіндік береді. Бүгінде облыста көптеген мемлекеттердің капиталы қатысатын кәсіпорындар жұмыс істеп, жаңа өндірістер іске қосылуда. Соңғы жылдары Түркістан облысында индустрияландыру жұмыстары қарқын алды. Түркістан қаласы, Кентау, Сауран, Ордабасы, Жетісай, Сайрам және басқа да аудан-қалаларда индустриялық аймақтар мен шағын өндірістік парктер құрылып, онда жаңа инвестициялық жобалар жүзеге асырылуда. Бұл өндірістер мыңдаған жаңа жұмыс орнын ашып, өңір экономикасының тұрақты дамуына серпін беруде.
Өңірдегі өнеркәсіптің жетекші бағыттарының бірі – тамақ өнімдерін өңдеу өнеркәсібі. Түркістан облысы республикадағы мақта, көкөніс, бақша өнімдері, жеміс-жидек және мал шаруашылығы өнімдерін көп өндіретін өңір болғандықтан, ауыл шаруашылығы өнімдерін терең өңдеуге басымдық берілуде. Облыста мақта талшығын өңдеу, мақта майын өндіру, ұн тарту, макарон, сүт және ет өнімдерін шығаратын кәсіпорындар тұрақты жұмыс істейді.
Сауран ауданында іске қосылған XingFeng Cotton кәсіпорны мақта шикізатын терең өңдеп, жоғары сапалы мақта майы мен мал азығына қажетті өнімдер шығарады. Бұл жоба ауыл шаруашылығы өнімдерінің қосылған құнын арттырып, экспорттық әлеуетті күшейтуге мүмкіндік берді. Сонымен қатар өңірде BNK Group кәсіпорны заманауи су үнемдеу технологияларын дамытуға үлес қосуда. Кәсіпорында BNK Irrigation брендімен жаңбырлатып суару машиналары, айналмалы және фронталды суару жүйелері өндіріледі. Өнімдер Қазақстанның ауыл шаруашылығы кәсіпорындарымен қатар көршілес мемлекеттердің нарығына да жеткізілуде. Бұл өндіріс су ресурстарын тиімді пайдалануға және аграрлық сектордың өнімділігін арттыруға ықпал етеді.
Кентау қаласында машина жасау және электр техникасы өндірісі қарқынды дамып келеді. Мұнда трансформаторлар, электр жабдықтары, металл конструкциялары және өнеркәсіптік жабдықтардың түрлі бөлшектері шығарылады. Өңірдегі құрылыс индустриясының дамуына байланысты темір-бетон бұйымдары, кірпіш, цемент өнімдері, газоблоктар және басқа да құрылыс материалдарын өндіретін кәсіпорындардың саны жыл сайын артып келеді. Облыста жеңіл өнеркәсіп те қарқын алып келеді. Мақтадан жіп иіру, тоқыма өнімдерін шығару, тігін өндірісі және арнайы жұмыс киімдерін тігу бағытындағы жобалар іске асырылуда. Бұл кәсіпорындар ішкі нарықты қамтамасыз етіп қана қоймай, экспортқа бағытталған өнім көлемін ұлғайтуда.
Түркістан облысының экономикасында ауыл шаруашылығы ерекше орын алады. Өңір республикадағы ең ірі суармалы егістік алқаптарының біріне ие. Мұнда мақта, жүгері, бидай, бақша өнімдері, көкөніс, жеміс-жидек, жүзім өсіріліп, жылыжай шаруашылығы белсенді дамуда. Сонымен қатар мал шаруашылығы, құс өсіру және балық шаруашылығы бағытындағы инвестициялық жобалар жүзеге асырылып келеді. Ауыл шаруашылығында тамшылатып және жаңбырлатып суару технологиялары кеңінен енгізіліп, цифрлық агротехнологиялар қолданылуда.
Туризм де өңір экономикасының негізгі драйверлерінің бірі саналады. Түркістан қаласындағы Қожа Ахмет Ясауи кесенесі, көне тарихи-мәдени ескерткіштер, ұлттық туристік нысандар мен жаңа мәдени кешендер жыл сайын миллиондаған туристі қабылдайды. Туризм саласын дамыту мақсатында жаңа қонақүйлер, демалыс орындары, ойын-сауық орталықтары мен туристік сервистер пайдалануға беріліп, халықаралық деңгейдегі іс-шаралар ұйымдастырылуда.
Түркістан облысында көлік және логистика саласына да ерекше көңіл бөлінуде. Автомобиль жолдарын жаңғырту, теміржол инфрақұрылымын жетілдіру, инженерлік-коммуникациялық желілерді кеңейту және өндірістік аймақтарды қажетті инфрақұрылыммен қамтамасыз ету бағытында ауқымды жұмыстар жүргізілуде. Бұл жаңа кәсіпорындардың ашылуына және инвестициялық тартымдылықтың артуына ықпал етуде.
Өңірдің әлеуметтік дамуы да экономикалық өсіммен қатар жүзеге асырылуда. Соңғы жылдары жаңа мектептер, балабақшалар, денсаулық сақтау нысандары, мәдениет үйлері, спорт кешендері мен тұрғын үйлер пайдалануға берілді. «Жайлы мектеп» ұлттық жобасы аясында заманауи білім беру ұйымдары салынып, халықты сапалы әлеуметтік инфрақұрылыммен қамтамасыз ету жұмыстары жалғасуда.
Шағын және орта кәсіпкерлікті қолдау – өңір экономикасының маңызды бағыты. Мемлекеттік бағдарламалар аясында кәсіпкерлерге жеңілдетілген несиелер, гранттар, инфрақұрылым тарту және инвестициялық қолдау көрсетілуде. Соның нәтижесінде өндіріс, қызмет көрсету, ауыл шаруашылығы және өңдеу өнеркәсібі салаларында жаңа кәсіпорындар ашылып, халықтың жұмыспен қамтылу деңгейі артып келеді.
Түркістан облысында халықаралық экономикалық ынтымақтастықты кеңейтуге де ерекше басымдық берілген. Қытай, Түркия, Өзбекстан, Оңтүстік Корея, Біріккен Араб Әмірліктері, Ресей және Еуропаның бірқатар елдерінің инвесторларымен бірлескен жобалар жүзеге асырылуда. Өңірге шетелдік бизнес өкілдерінің қатысуымен инвестициялық форумдар, халықаралық бизнес-кездесулер мен сауда-экономикалық миссиялар тұрақты ұйымдастырылып келеді. Осындай келіссөздердің нәтижесінде ауыл шаруашылығы өнімдерін өңдеу, өнеркәсіп, жаңартылатын энергия көздері, құрылыс материалдарын өндіру және логистика салаларында жаңа инвестициялық жобалар қолға алынуда.
Бүгінде Түркістан облысы өндіріс, ауыл шаруашылығы, туризм және инвестиция салаларын үйлестіре отырып, экономиканың тұрақты өсімін қамтамасыз етіп келеді. Заманауи зауыттар мен фабрикалардың іске қосылуы, халықаралық серіктестіктің кеңеюі, инфрақұрылымның жаңаруы және кәсіпкерлікті қолдау шаралары өңірдің инвестициялық тартымдылығын арттыруда. Осылайша Түркістан облысы әлеуметтік-экономикалық дамудың жаңа кезеңіне қадам басып, еліміздің ең серпінді әрі инвестиция үшін қолайлы өңірлерінің бірі ретіндегі позициясын нығайтып келеді.
Leave a reply
