АЙТЫЛДЫ – ОРЫНДАЛДЫ

Тұран ауданында «AMANAT» партиясының қоғамдық қабылдау бөлмесіне №8 шағын ауданның тұрғындары жүгініп, өздерін алаңдатқан мәселені көтерді. №34 үйдің ауласында тұрған қураған үлкен ағаш құлап кету қаупін туғызып, тұрғындардың қауіпсіздігіне қатер төндірген. Осыған байланысты халық партия филиалы арқылы тиісті органдарға өтініш жеткізуді сұрады.

Азаматтардың өтінішін тыңдаған Тұран аудандық партия филиалының Атқарушы хатшысы Есімхан Қалмаханұлы мәселе назардан тыс қалмайтынын айтып, аудан әкімдігіне ресми түрде хабар беруді өз міндетіне алды. Бұл – халықтың үнін ескерудің, азаматтардың өтінішіне жедел жауап берудің нақты көрінісі.

Қысқа уақыт ішінде тұрғындардың талабы ескеріліп, Тұран аудандық коммуналдық мекемесінің мамандары көрсетілген мекенжайға барып, қауіпті ағашты ретке келтірді. Қауіптің алдын алу үшін тиісті жұмыстар атқарылып, аула тұрғындары үшін қолайлы әрі қауіпсіз жағдай жасалды.

Бұл бастама – «Айтылды – орындалды» қағидатының шынайы жүзеге асуы. Азаматтардың ұсынысы назарға алынып қана қоймай, қысқа мерзімде нақты шешім қабылданды. Мұндай іс-әрекеттер тұрғындар мен билік арасындағы сенімді нығайтып, қоғамдағы әділеттіліктің орнығуына ықпал етеді.

Мемлекет басшысы Қасым-Жомарт Тоқаев өз Жолдауларында: «Халық үніне құлақ асатын мемлекет – баршаға әділдік пен сенім орнатудың негізгі жолы. Мемлекеттік органдар әрбір азаматтың мәселесін дер кезінде шешуі тиіс» деп атап өткен болатын. Тұран ауданындағы осы оқиға Президент ұстанымының іс жүзінде көрініс тапқанын айғақтайды.

Тұрғындар тарапынан айтылған ұсыныстар дер кезінде орындалғанда, қоғамда белсенді азаматтық ұстаным қалыптасады. Өйткені әрбір адамның сөзі ескеріліп, іс жүзіне асқанда ғана мемлекетке деген сенім артады.

«AMANAT» партиясы мұндай қоғамдық қабылдауларды алдағы уақытта да тұрақты түрде жалғастырып, халықтың өтінішін билікке жеткізетін негізгі көпір болуды көздеп отыр. Себебі халық үніне құлақ асу – әділетті Қазақстан құру жолындағы ең басты қағидаттардың бірі.