Азамат үні – билік пен қоғам арасындағы көпір

Қоғамдағы әрбір азаматтың дауысы естілуі мен пікірінің ескерілуі – демократиялық мемлекеттің басты ұстанымы. Президент Қасым-Жомарт Тоқаев ұсынған «Халық үніне құлақ асатын мемлекет» тұжырымдамасы осы бағыттағы нақты іс-қимылдың өзегіне айналып отыр. Бұл қағиданы жүзеге асыру жолында қоғамдық институттар мен саяси партиялардың рөлі ерекше. Соның айқын мысалы ретінде «AMANAT» партиясының Шымкент қаласындағы қоғамдық қабылдау алаңдарының жұмысы аталады.

Мұндай қабылдауларда қоғамның түрлі әлеуметтік тобы өкілдері өз мәселелерін тікелей жеткізеді. Жақында өткен кездесуде мәслихат депутаты Бақытжан Сейітжан бірнеше азаматтың өтінішін тыңдап, нақты шешу тетіктерін ұсынды. Көпбалалы және жалғызбасты аналар, ерекше қажеттілігі бар жандар көтерген проблемалар – әлеуметтік қамсыздандыру, дәрі-дәрмекпен қамтамасыз ету, тұрмыстық қолдау сияқты күнделікті өмірге қатысты өзекті тақырыптарды қамтыды. Әрбір өтініс жеке қаралып, тиісті мекемелерге жолданды.

Мұндай тікелей диалог алаңы партия мен қоғам арасындағы сенімді нығайтады. Себебі мемлекеттік шешімдердің тиімділігі халықтың шынайы пікіріне сүйенгенде ғана артады. Азаматтардың белсенділігі мен үн қатысуы жергілікті және орталық деңгейдегі саясаттың сапасын айқындайды. Әр тұрғын өз мәселесін жеткізіп қана қоймай, шешім қабылдау үдерісінің белсенді бөлігіне айналғанда ғана ел басқару жүйесі шын мәнінде ашық сипат алады.

«AMANAT» партиясының бастамасы – халық пен билік арасындағы көпір іспетті. Мұнда басты мақсат – әлеуметтік әділеттілік пен азаматтық жауапкершілікті қатар ұштастыру. Осындай форматтағы қабылдаулар қоғамдағы өзара сенімді арттырып, мемлекеттік институттардың халыққа жақындай түсуіне ықпал етеді. Бұл үрдіс елдегі саяси мәдениеттің дамуы мен азаматтық сана-сезімнің күшеюіне де тікелей әсер етеді.