ОРДАБАСЫ АУЫЗ СУМЕН 100 ПАЙЫЗ ҚАМТЫЛДЫ

Ордабасы ауданында елді мекендерді таза ауыз сумен қамтамасыз ету бағытындағы жұмыстар Мемлекет басшысының тапсырмасына сай жоспарлы түрде жүзеге асырылып, биыл маңызды межеге толық қол жеткізілді. Президент жүктеген барлық елді мекендерді 100 пайыз ауыз сумен қамту міндеті уақытында орындалып, Ордабасы ауданы еліміздегі ауызсу инфрақұрылымын толық аяқтаған өңірлердің қатарына қосылды. Бұл аудан халқының тұрмыс сапасын арттыруға бағытталған стратегиялық қадамдардың жемісі болып отыр.

2024 жылдың қорытындысы бойынша аудандағы 57 елді мекеннің 54-і орталықтандырылған сапалы ауыз сумен қамтылып, қамту деңгейі 94,7 пайызды құраған еді. Ал қалған Мәдениет, Ынтымақ және Жұлдыз елді мекендерінде бұған дейін мүлде су жүйесі болмаған. Осыған байланысты аталған елді мекендерде құрылыс-монтаждау жұмыстары жүргізіліп, жаңа су жүйелері салынып, қазан айында ел игілігіне тапсырылды. Бұл жобалардың уақтылы аяқталуының арқасында ауданның барлық 57 елді мекені толықтай ауыз сумен қамтылып, көптен күткен мәселе түбегейлі шешімін тапты.

Ауызсу инфрақұрылымын дамыту тек жаңа нысандар салумен шектелмейді. Қолданыстағы су жүйелерінің үздіксіз әрі сапалы жұмыс істеуі — тұрғындардың күнделікті тұрмысында шешуші рөл атқарады. Осы мақсатта Ақбұлақ, Қайнар, Ұялыжар, Ықыластемір, Теспе, Жамбыл, Бірлік, Бөген, Жеңіс, Қызылжар және Көктөбе елді мекендерінде ағымдағы жөндеу жұмыстары қолға алынып, тозығы жеткен құбырлар мен жүйе бөлшектері жаңартылуда. Бұл шаралар келешекте ауыз су беру процесінің тұрақтылығын арттырып, тұрғындардың су тапшылығын сезінбеуіне мүмкіндік береді.

Сонымен қатар болашаққа бағытталған жұмыстар да назардан тыс қалған жоқ. Аудандық бюджет есебінен Төрткүл, Көкарал, Бадам, Шұбар, Бөген және Қарақұм елді мекендерінің ауыз су жүйелерін қайта құру бойынша жобалық-сметалық құжаттамалар әзірленді. Бұл құжаттар уәкілетті органдарға ұсынылып, құрылыс жұмыстарына қажетті қаржыландыруды қарастыру мәселесі қаралуда. Жобалардың мақсаты — ауыз су желілерін заман талабына сай жаңартып, келешек ұрпаққа сапалы инфрақұрылым қалдыру.

Аудан аумағында жүйелі әрі кешенді түрде атқарылған бұл жұмыстардың нәтижесінде мыңдаған тұрғын сапалы ауыз суға тұрақты түрде қол жеткізді. Бұл бастама ауылдық жерлердің әлеуметтік және экономикалық дамуына жаңа серпін беріп, халықтың күнделікті өмір сүру деңгейін жақсарта түсті. Ауыз су мәселесінің толық шешілуі тек коммуналдық тұрғыдағы жетістік қана емес, тұрмыс сапасын жақсартуға бағытталған мемлекеттік саясаттың табысты жүзеге асуының бір көрінісі.

Ордабасы ауданының соңғы жылдары инфрақұрылымдық жаңғыруды кешенді жүргізуі тұрғындардың сенімін күшейтіп, өңірдің тұрақты дамуына жол ашып отыр. Ауызсу жүйелерінің толық аяқталуы ауданның әлеуметтік әлеуетін арттырып, ауылдардың өмір сүру стандартын жаңа деңгейге көтерді. Бұл маңызды қадам алдағы уақытта да Ордабасы өңірінің өркендеуіне үлес қоса беретіні сөзсіз.