ШЕТЕЛДІК КӘСІПКЕРЛЕРГЕ АРНАЛҒАН «АЛТЫН ВИЗА» ЦИФРЛЫҚ ЖОБАСЫ ӨҢІРДЕ ҚАЛАЙ ЖҮЗЕГЕ АСАДЫ?

Түркістан облысында инвестиция тарту және өндірістік инфрақұрылымды дамыту бағытында жүйелі жұмыстар жүргізілуде. Өңірдің инвестициялық тартымдылығын арттыру мақсатында индустриалды аймақтар мен шағын өндірістік парктердің қызметі кеңейтіліп, жаңа өндіріс орындарын ашуға қолайлы жағдай жасалуда. Облыста индустриалды аймақтар экономикалық өсімнің негізгі драйверлерінің бірі ретінде қалыптасып отыр. Бұл аймақтарда инфрақұрылым толық қамтамасыз етіліп, электр энергиясы, газ, су және көлік логистикасы сияқты негізгі инженерлік желілер тартылған. Соның нәтижесінде инвесторлар үшін өндіріс ашу процесі жеңілдетіліп, бюрократиялық кедергілер азайтылған.

Мемлекет басшысы осыған дейін өз өзінде Қазақстан цифрлық ел болуды көздеп отыр. Бұл – еліміздің алдында тұрған стратегиялық мақсат екенін тілге тиек еткен-ді.

— Шетелден келген кәсіпкерлерге, инвесторларға, білікті мамандарға арналған «Алтын визаны» енгіздік. Мұндай виза алған адамдар мемлекеттік және қаржылық қызметтерге Қазақстан азаматтарымен тең дәрежеде қол жеткізе алады.

Сонымен қатар елімізде Цифрлық кодекс қабылданды, Жасанды интеллект туралы заң күшіне енді.

Біз білім саласындағы цифрлық инфрақұрылымды дамыту және озық технологияны меңгерген педагогтерді даярлау мәселесіне, білім беру жүйесін әр оқушының қабілетіне сай бейімдеу, олардың дербес деректерін қорғау ісіне ерекше мән беріп отырмыз.

Осы мақсатпен мен жақында Жасанды интеллектіні орта білім беру жүйесіне енгізу туралы Жарлыққа қол қойдым. Бұл да Қазақстанның болашағы үшін жасалған өте маңызды қадам деп айтуға болады. Алдағы уақытта еліміздің цифрлық даму бағдарын айқындайтын Digital Qazaqstan стратегиясы бекітіледі. Бұл жоба аймақ елдеріне жетекші технологиялық компаниялар мен жаһандық цифрлық капиталды тартуға зор мүмкіндік бермек. Біз Қазақстанды аймақтық хаб ретінде дамыту үшін көші-қон үдерісін оңтайландыра бастадық, — деді Ел президенті.

Сонымен «Алтын виза» дегеніміз – шетелдік кәсіпкерлерге, инвесторларға және жоғары білікті мамандарға елде ұзақ мерзімді тұруға және инвестициялық қызметпен айналысуға мүмкіндік беретін арнайы құқықтық режим. Бұл бағдарлама негізінен шетелдік инвестицияны тарту, экономиканы дамыту және халықаралық бизнес байланыстарды кеңейту мақсатында енгізіледі. «Алтын виза» иегерлері ел аумағында бизнес ашуға, инвестициялық жобаларға қатысуға және экономиканың түрлі салаларында қызмет етуге мүмкіндік алады. Сонымен қатар бұл мәртебе шетелдік мамандардың ел ішінде тұрақты жұмыс істеуіне және кәсіби қызметін еркін жүзеге асыруына жағдай жасайды. Бағдарламаның басты мақсаты – инвестициялық климатты жақсарту, елге капитал тарту және инновациялық жобаларды дамытуға шетелдік серіктестерді тарту. Бұл өз кезегінде жаңа жұмыс орындарының ашылуына, технология трансферіне және экономиканың әртараптануына ықпал етеді. Әлемдік тәжірибеде «Алтын виза» бағдарламасы көптеген мемлекеттерде қолданылады және ол ірі инвесторлар мен талантты мамандарды тартудың тиімді құралы ретінде танылған. Мұндай жүйе елдің халықаралық бәсекеге қабілеттілігін арттыруға және жаһандық нарықта позициясын нығайтуға мүмкіндік береді.

Инвестиция тарту бағытында облыста шетелдік және отандық инвесторлармен белсенді жұмыс жүргізілуде. Арнайы экономикалық аймақтар мен индустриалды алаңдарда жаңа жобаларды іске асыру үшін инвестициялық келіссөздер ұйымдастырылып, қолдау тетіктері қарастырылуда.

Облыс экономикасына тартылған инвестициялар өңірдің өнеркәсіптік әлеуетін арттырып, жаңа жұмыс орындарын ашуға және өндіріс көлемін ұлғайтуға ықпал етуде. Бұл өз кезегінде халықтың әл-ауқатын жақсартуға және өңірдің экономикалық тұрақтылығын күшейтуге мүмкіндік береді. Индустриалды аймақтардың басты қызметі – өңірге жаңа өндірістерді тарту, импортты алмастыратын өнім шығаратын кәсіпорындарды дамыту және жаңа жұмыс орындарын құру. Қазіргі таңда бұл аймақтарда құрылыс материалдары, азық-түлік өнімдері, жеңіл өнеркәсіп, пластик бұйымдары және ауыл шаруашылығы өнімдерін қайта өңдеу бағытындағы кәсіпорындар жұмыс істеуде. Сонымен қатар Түркістан облысында шағын өндірістік парктерді дамытуға ерекше көңіл бөлінуде. Бұл парктер шағын және орта бизнес өкілдеріне дайын өндірістік алаңдар ұсынып, кәсіп бастауға қажетті инфрақұрылыммен қамтамасыз етеді. Бұл өз кезегінде кәсіпкерлердің бастапқы шығындарын азайтып, өндірісті жылдам іске қосуға мүмкіндік береді.

Шағын өндірістік парктерде тігін цехтары, жиһаз өндірісі, құрылыс материалдарын шығару, қайта өңдеу және ауыл шаруашылығы өнімдерін өңдеу сияқты түрлі бағыттағы кәсіпорындар орналасқан. Мұндай өндірістер жергілікті нарықты сапалы өніммен қамтамасыз етіп қана қоймай, экспорттық әлеуетті де арттыруда.