Түркі мемлекеттері ұйымына мүше елдердің Білім беру министрлерінің IX отырысы аясында Түркістанда университет ғалымдары әзірлеген жасанды интеллект пен цифрлық технологияларға негізделген инновациялық жобалар кең көлемде таныстырылды. Аталған көрме білім, ғылым және цифрлық трансформация бағытындағы өңірлік және халықаралық ынтымақтастықты нығайтудың маңызды алаңына айналды.
Көрмені Қазақстан Республикасының Ғылым және жоғары білім министрі Саясат Нұрбек, Оқу-ағарту министрінің орынбасары Шынар Ақпарова, Түркия Республикасының Ұлттық білім министрі Юсуф Текин және Жоғары білім кеңесінің төрағасы Ерол Өзвар, Түркі мемлекеттері ұйымының Бас хатшысы Кубанычбек Өмірәлиев, Әзербайжан Республикасының ғылым және білім министрі Эмин Амруллаев, Қырғыз Республикасының білім министрі Догдуркүл Кендірбаева, сондай-ақ Өзбекстан Республикасы Жоғары білім, ғылым және инновациялар министрінің бірінші орынбасары Сардор Раджабов бастаған ресми делегациялар тамашалады. Бұл шара түркі әлемі елдері арасындағы ғылыми-технологиялық әріптестікті жаңа деңгейге көтеруге бағытталған маңызды қадам ретінде бағаланды.
Көрме барысында ұсынылған жобалардың бірі – мемлекеттік сатып алулардағы тәуекелдерді анықтауға арналған «BAQYLAY.KZ» платформасы болды. Бұл жүйе деректерді талдау және жасанды интеллект алгоритмдері арқылы сатып алу үдерістеріндегі ықтимал тәуекелдерді алдын ала анықтауға мүмкіндік береді. Платформаның басты мақсаты – ашықтықты арттыру, сыбайлас жемқорлық тәуекелдерін төмендету және басқарушылық шешімдердің тиімділігін күшейту.
Сонымен қатар, көпшілік назарына «AI-Jan» цифрлық экожүйесі ұсынылды. Бұл жоба білім беру ұйымдарындағы қауіпсіздік деңгейін арттыруға бағытталған. Жасанды интеллект технологияларын қолдану арқылы жүйе мектептер мен оқу орындарындағы жағдайды мониторингтеп, ықтимал қауіптерді дер кезінде анықтауға мүмкіндік береді. «AI-Jan» экожүйесі білім беру инфрақұрылымын цифрландырудағы кешенді шешімдердің бірі ретінде ерекше қызығушылық тудырды. Инвестициялық үдерістердің тиімділігін арттыру мақсатында әзірленген «IN-MAP» ақпараттық жүйесі де көрмеде таныстырылды. Бұл платформа инвестициялық жобаларды басқару, олардың орындалу барысын бақылау және тиімділігін бағалау функцияларын біріктіреді. Жүйе мемлекеттік және жеке сектор арасындағы өзара іс-қимылды жетілдіруге бағытталған.
Экологиялық бағыттағы инновация ретінде Ботаникалық бақтың цифрлық егізі (Digital Twin) жобасы ұсынылды. Аталған жоба табиғи экожүйелерді цифрлық форматта модельдеу арқылы өсімдіктердің жағдайын бақылауға, экологиялық мониторинг жүргізуге және ғылыми зерттеулердің дәлдігін арттыруға мүмкіндік береді. Бұл бастама жасыл технологиялар мен цифрлық шешімдерді ұштастырудың айқын үлгісі ретінде бағаланды.
Медицина саласына арналған «MEDAI» интеллектуалды жүйесі де көрме қатысушыларының ерекше қызығушылығын тудырды. Жүйе рентгендік зерттеулерді жасанды интеллект көмегімен талдап, дәрігерлердің диагностикалық шешім қабылдау процесін қолдауға бағытталған. Бұл технология медициналық қызмет сапасын арттырып, диагностика жылдамдығын едәуір жақсартуға мүмкіндік береді. Жалпы алғанда, ұсынылған жобалар университет ғалымдарының жоғары ғылыми әлеуетін және жасанды интеллект пен цифрлық технологияларды түрлі салаларға енгізудегі инновациялық көзқарасын айқын көрсетті. Бұл бастамалар білім беру, денсаулық сақтау, экология, инвестиция және мемлекеттік басқару салаларында цифрлық трансформацияны жеделдетуге ықпал етеді.
Түркістанда өткен халықаралық деңгейдегі бұл көрме түркі елдері арасындағы ғылыми ынтымақтастықты күшейтіп қана қоймай, ортақ цифрлық кеңістікті дамытуға бағытталған жаңа серпін берді. Жасанды интеллектке негізделген жобалардың таныстырылуы өңірдің инновациялық әлеуетін айқындап, болашақта бірлескен ғылыми зерттеулер мен технологиялық шешімдерді дамытуға жол ашты. Түркістан облысында цифрлық трансформацияны жеделдету және экономикалық тиімділікті арттыру бағытында ауқымды жобалар мен жүйелі жұмыстар кезең-кезеңімен жүзеге асырылуда. Бұл бастамалар өңірдің барлық салаларын цифрландыруға, басқару процестерін оңтайландыруға және халыққа көрсетілетін қызметтердің сапасын арттыруға бағытталған.
Білім беру және денсаулық сақтау салаларында да цифрлық трансформация қарқынды жүргізілуде. Электронды оқыту жүйелері, онлайн платформалар, телемедицина және цифрлық медициналық деректер базасы енгізіліп, қызмет көрсету сапасы айтарлықтай жақсаруда.
Сонымен қатар өңірде «ақылды қала» және «ақылды ауыл» жобалары дамытылуда. Бейнебақылау жүйелері, қоғамдық қауіпсіздік платформалары, смарт жарықтандыру және коммуналдық қызметтерді цифрлық басқару элементтері кезең-кезеңімен енгізілуде. Бұл қалалық және ауылдық инфрақұрылымды тиімді басқаруға мүмкіндік береді.
Leave a reply
