Жауапкершіліктің жүгін арқалаған жан

Қазығұрт станциясына таңғы сағат жетіде барған кезде жұмыс қарбаласы әлдеқашан басталып кеткен еді. Вагондардың қозғалысы, жүктердің қабылдануы мен жіберілуі – бәрі жүйелі ұйымдастырылған. Сол қозғалыстың қақ ортасында аға жүк қабылдап тапсырушысы Жидебаева Қалдыкүл Төлендіқызы тынымсыз еңбек етіп жүр.

1978 жылдың 8 қыркүйегінде дүниеге келген Қалдыкүл Төлендіқызы теміржол саласында абыроймен қызмет етіп келе жатқан білікті маман. Бүгінде ол жүк тасымалын қабылдау, рәсімдеу, уақтылы тапсыру ісінде айрықша жауапкершілік танытып келеді. Қарапайым көрінгенімен, бұл жұмыс өте күрделі: әрбір құжаттың дұрыстығы, әрбір жүктің сақталуы, уақытылы жеткізілуі – бәрі осы маманның кәсібилігіне байланысты.

Станциядағы әріптестері оның ұқыптылығын, тәжірибесін, тіпті қиын жағдайда да байыппен шешім қабылдай білетінін ерекше атап өтеді. «Қалдыкүл апай әр істе әділдік пен адалдықты бірінші орынға қояды. Біз үшін ол – нағыз ұстаз, үлгі болатын жан» дейді жас мамандар.

Қарапайым еңбек адамының күнделікті жұмысы сырт көзге байқала бермейді. Бірақ дәл осы еңбексіз теміржолдың да, ел экономикасының да алға басуы мүмкін емес. Президент Қасым-Жомарт Тоқаев өзінің «Адал азамат» тұжырымдамасында еңбекқор, қоғамға пайдасын тигізіп жүрген жандардың мәртебесін көтеру қажеттігін жиі айтады. Бұл ой Қалдыкүл Төлендіқызының өмір жолымен толық сәйкес келеді.

Күнделікті жұмысында ол әріптестеріне жігер беріп, тәжірибесімен бөлісуден жалықпайды. Әсіресе жастарға бағыт-бағдар көрсетіп, еңбекке адал болуды үйретуі – оның үлкен адамгершілігінің көрінісі. «Әрбір адам ең алдымен өз ісіне адал болуы керек. Адалдық – табыстың кілті. Жүкті дұрыс рәсімдеу де, оны уақтылы тапсыру да адалдыққа сүйенеді», – дейді ол.

Теміржол – күрделі сала, ал жүкті қабылдап тапсырушының жұмысы – сол саланың басты буындарының бірі. Әрбір құжатқа, әрбір санға мұқият қарау – Қалдыкүл Төлендіқызының күнделікті әдеті. Бұл – жай ғана жұмыс емес, ел алдындағы жауапкершілік екенін ол жақсы түсінеді.

Осындай еңбекқор, кәсібіне берілген азаматтар – елдің шынайы байлығы. Жидебаева Қалдыкүл Төлендіқызы – солардың қатарындағы абыройлы маман. Оның адалдығы мен табандылығы жас ұрпаққа үлгі, ал кәсібіне беріктігі – Қазақстан қоғамының өркендеуіне қосылған шынайы үлес.