Түркістан облысында жастарды әскери-патриоттық рухта тәрбиелеу, әскери қызметтің беделін арттыру және Қазақстан Республикасы Қарулы Күштерінің қоғамдағы рөлін кеңінен насихаттау мақсатында әскери бөлімдерде тұрақты түрде «Ашық есік күндері» ұйымдастырылып келеді. Бұл іс-шаралар әскери қызметтің ерекшеліктерін көпшілікке таныстырумен қатар, жастардың әскери мамандықтарға деген қызығушылығын арттыруға және Отан қорғау ісіне жауапкершілікпен қарауға бағытталған маңызды ақпараттық-патриоттық алаңға айналды.
Өңірде әскери бөлімдердің қатысуымен Ашық есік күндері, әскери техника мен мамандандырылған жабдықтардың таныстырылымдары, әскери-қолданбалы спорт түрлерінен жарыстар және патриоттық акциялар өткізіледі. Жастар әскери қызметшілердің күнделікті жұмысымен танысып, әскери дайындық үдерісінің жалпы қағидаттары туралы ақпарат алады. Бұл іс-шаралар әскери қызметке деген қызығушылықты арттырып, мемлекеттік қызметтің жауапкершілігін тереңірек түсінуге мүмкіндік береді.
«Ашық есік күндері» аясында облыстың мектептері, колледждері және жоғары оқу орындарының білім алушылары әскери бөлімдерге арнайы барып, әскери қызметтің күнделікті тыныс-тіршілігімен танысады. Іс-шараларға алғашқы әскери және технологиялық дайындық пәнінің оқытушылары, әскери-патриоттық клубтардың мүшелері, жастар ұйымдарының өкілдері, ата-аналар және бұқаралық ақпарат құралдарының қызметкерлері де қатысып келеді. Бұл әскери қызмет туралы ашық әрі жан-жақты ақпарат алуға мүмкіндік береді.
Бағдарлама барысында қатысушылар әскери бөлімнің жалпы қызметімен таныстырылып, әскери тәртіптің ұйымдастырылуы, сарбаздардың күн тәртібі, жауынгерлік даярлықтың негізгі бағыттары, әскери ұжымдағы тәртіп пен жауапкершілік қағидаттары жөнінде ақпарат алады. Әскери қызметшілер келушілерге әскери өмірдің ерекшеліктерін түсіндіріп, қызмет барысында қойылатын талаптар мен әскери қызметтің қоғамдағы маңызын кеңінен баяндайды. Іс-шаралардың маңызды бөлігінің бірі – әскери техникалар мен арнайы жабдықтардың таныстырылымы. Қатысушылар әскери мақсаттағы автокөліктердің, байланыс құралдарының, инженерлік жабдықтардың және жеке қорғаныс құралдарының жалпы қолданылу мақсаты туралы ақпарат алады. Сонымен қатар әскери мамандар жабдықтардың қолданылу тәртібін түсіндіріп, олардың елдің қорғаныс қабілетін қамтамасыз етудегі рөліне тоқталады.
«Ашық есік күндері» барысында сарбаздардың тұрмыс жағдайына да ерекше назар аударылады. Қонақтар казармадағы тұрмыстық бөлмелерді, асхананы, спорт залдарын, кітапхананы, медициналық пунктті және демалыс орындарын аралап көреді. Бұл әскери қызмет өткерушілерге жасалған әлеуметтік-тұрмыстық жағдайлармен танысуға мүмкіндік береді әрі қоғамда әскери қызмет туралы қалыптасқан түсінікті нақты мәліметтермен толықтырады.
Бағдарлама аясында әскери қызметшілер саптық дайындықтың, дене даярлығының және әскери тәртіптің маңызын көрсететін көрнекі көрсетілімдер ұйымдастырады. Сонымен қатар әскери оркестрдің өнер көрсетуі, әскери-патриоттық әндер мен көрсетілімдер іс-шараның тәрбиелік маңызын арттыра түседі.
Кездесулердің тағы бір маңызды бөлігі – жастармен еркін форматтағы сұхбаттар. Әскери бөлімдердің офицерлері мен келісімшарт бойынша қызмет атқарып жүрген әскери қызметшілер әскери өмірдің ерекшеліктері, әскери білім алу мүмкіндіктері, әскери мансаптың кезеңдері және әскери қызметтің әлеуметтік кепілдіктері туралы кеңінен ақпарат береді. Қатысушылар өздерін қызықтырған сұрақтарын қойып, әскери қызметке қабылдау талаптары, мерзімді әскери қызмет пен келісімшарт бойынша қызметтің айырмашылықтары жөнінде жан-жақты жауап алады. Сонымен қатар әскери жоғары оқу орындарына түсуге ниетті жастар үшін арнайы ақпараттық кездесулер өткізіледі. Онда әскери білім беру жүйесі, қабылдау талаптары, мамандықтар тізімі, оқу кезеңіндегі әлеуметтік қолдау, шәкіртақы және оқу аяқталғаннан кейінгі қызмет мүмкіндіктері туралы түсіндіріледі. Бұл жұмыстар талапкерлердің саналы түрде кәсіби таңдау жасауына ықпал етеді.
Түркістан облысында өткізілетін «Ашық есік күндері» әскери-патриоттық тәрбиенің маңызды элементтерінің біріне айналып отыр. Мұндай іс-шаралар жастардың бойында патриотизмді, тәртіпті, жауапкершілікті және азаматтық ұстанымды қалыптастыруға ықпал етеді. Сонымен бірге әскери бөлімдердің қоғаммен ашық байланысын нығайтып, тұрғындардың Қарулы Күштерге деген сенімін арттыруға мүмкіндік береді.
Бүгінде әскери бөлімдердегі «Ашық есік күндері» білім беру ұйымдары мен әскери құрылымдардың өзара ынтымақтастығын күшейтетін, жастарды әскери қызметке қызықтыратын және елдің қорғаныс қабілетін нығайтуға бағытталған мемлекеттік саясатты қолдайтын маңызды алаң ретінде өз тиімділігін көрсетіп келеді.
Leave a reply
