Түркістан облысының ауыл шаруашылығы саласы тұрақты оң даму динамикасын көрсетіп, өңір экономикасының негізгі драйверлерінің бірі ретінде өз маңызын арттырып келеді. Аграрлық сектордағы жүйелі жұмыстар мен мемлекеттік қолдау шараларының нәтижесінде өндіріс көлемі ұлғайып, инвестициялық тартымдылық күшейіп отыр.
Түркістан облысында ауыл шаруашылығы дақылдарын өткен жылмен салыстырғанда 8 мың гектарға ұлғайтылып, жалпы 919 мың гектарға егілді. Оның ішінде, жаздық дақылдар 536 мың гектар, күздік егіс 208 мың гектар, ескі жоңышқа 175 мың гектар жерге себілді. Егіс құрылымына сәйкес, мақта 17 мың гектарға (162 мың га), мақсары 16 мың гектарға (85,4 мың га) жүгері 15 мың гектарға (55,2 мың га) артса, ал су шығынын төмендету бағытында күріш 7 мың гектарға (3,5 мың га) қысқартылды. Тауар өндірушілер жаздық дақылдардың тұқымымен толық қамтамасыз етілді. Минералдық тыңайтқыштарды егіс алқаптарына 204 мың тонна енгізу жоспарланып, бүгінгі күнге 90 мың тонна енгізілді. Жеңілдетілген 53 мың тонна жанар-жағармайға қажеттілік анықталды. Бүгінгі күнге 23,7 мың тоннасы босатылды. Босату жұмыстары мерзімінде жүргізіліп жатыр. Мемлекет басшысының су үнемдеу технологияларын кеңінен ендіру тапсырмасы аясында биыл жоспар 27 мың гектар болса, 50 мың гектарға енгізіліп, жоспар 2 есеге артығымен орындалмақ. Нәтижесінде су үнемдеу технологиялары енгізілген жалпы алқап 164 мың гектарды құрап, 280 млн текше метр ағын су үнемдеуге қол жеткізіледі. Бүгінгі күнге су үнемдеу технологиялары жаңадан 37 мың гектар жерге енгізілді. Өңірде ауыл шаруашылығы дақылдарын шегіртке зиянкестерінен қорғау мақсатында фитосанитариялық мониторинг және химиялық өңдеу жұмыстары жоспарлы түрде жүргізілуде. Биыл 906 мың гектар аумақта зерттеу жүргізу жоспарланып, бүгінгі таңда 889 мың гектар жер зерттелді. Өңдеу жұмыстарына арнайы техника, су тасымалдау көліктері, аэрозольді генераторлар, дрондар және авиациялық құралдар тартылды. Шегіртке зиянкестеріне қарсы күрес шаралары тұрақты бақылауда.
Облыста мал шаруашылығының даму қарқыны жоғары. Республикадағы ұсақ малдың 20 пайызы (5224,5 мың бас), ірі қара малдың 13 пайызы (1249,6 мың бас), түйенің 14 пайызы (44,8 мың бас), жылқының 10 пайызы (530,9 мың бас) және құс басының 5 пайызы (2260,2 мың бас) облыстың үлесінде. 2026 жыл қаңтар-сәуір айларына 76 мың тонна ет (121,7%), 161 мың тонна сүт (98,6%), және 108 млн дана жұмыртқа (135%) өндірілді. Өңірде эпизоотологиялық ахуал тұрақты. Ветеринариялық ұйымдарды материалдық қамтамасыз ету мақсатында жалпы сипаттағы трансферттер есебінен 3,9 млрд теңге қаржы қаралып 4 ветеринариялық станция, 109 ветеринариялық бекет, 21 мал өлексесін тастайтын орындарды салыну үстінде.
Республикада экспортқа шығарылатын ірі қара мал етінің 80 пайызы, қой етінің 75 пайызы облыстың еншісінде. 4 айда 4,2 мың тонна ірі қара мал еті, 9,4 мың тонна қой еті экспортқа бағытталды. Үкіметтің тікелей қолдауымен облыста жалпы қуаттылығы 50 мың басқа арналған ірі бордақылау алаңы іске қосылды. Бұдан бөлек, 30 мың басқа арналған 6 кәсіпорын экспорттаушылар тізіміне енгізілді. Ет кластерін дамыту бағытында құны 54,1 млрд теңгені құрайтын 8 инвестициялық жоба жүзеге асырылуда. Жобалар арқылы 800-ге жуық жаңа жұмыс орны құрылады. Аталған жобалардың нәтижесінде жылына 18 мың тонна ет, 90 мың тонна өңделген ет өндіріліп, жыл сайын 53,5 млрд теңгенің өнімі өндірілмек.
2026 жылдың алғашқы 4 айының қорытындысы бойынша ауыл шаруашылығының жалпы өнім көлемі 206 млрд теңгені құрап, өсім 111,3 пайыз деңгейіне жетті. Бұл көрсеткіш өңірдегі егін және мал шаруашылығы бағыттарында өндірістік тиімділіктің артқанын және ауыл шаруашылығы құрылымдарының тұрақты жұмыс істеп отырғанын көрсетеді.
Агроөнеркәсіптік кешенді дамыту бағытында негізгі капиталға тартылған инвестициялар көлемі де айтарлықтай өсім көрсетті. Атап айтқанда, 4 айдың ішінде салаға 56,4 млрд теңге инвестиция тартылып, жоспарланған көрсеткіш 1,8 есеге артығымен орындалды. Бұл ауыл шаруашылығы саласына жеке инвестициялардың белсенді тартылып жатқанын және жаңа жобалардың іске асырылу қарқынының жоғары екенін айғақтайды. Облыста аграрлық секторды дамыту мақсатында су үнемдеу технологияларын енгізу, жылыжай шаруашылығын кеңейту, қайта өңдеу кәсіпорындарын дамыту және мал шаруашылығының өнімділігін арттыру бағытында кешенді жұмыстар жүргізілуде. Бұл шаралар өнім көлемін ұлғайтып қана қоймай, ауыл шаруашылығы өнімдерінің бәсекеге қабілеттілігін арттыруға мүмкіндік беруде. Сонымен қатар ауыл шаруашылығы өнімдерін терең өңдеу бағытында жаңа өндіріс орындары іске қосылып, қосылған құны жоғары өнім өндіруге басымдық берілуде. Бұл өз кезегінде ішкі нарықты қамтамасыз етуге және экспорттық әлеуетті арттыруға жол ашып отыр.
Түркістан облысының агроөнеркәсіптік кешені тұрақты даму жолына түсіп, өндіріс көлемі мен инвестиция тарту көрсеткіштерінің артуы өңірдің экономикалық өсіміне айтарлықтай серпін беруде. Алдағы уақытта да бұл бағыттағы жұмыстарды күшейту, заманауи технологияларды кеңінен енгізу және ауыл шаруашылығы өнімдерінің сапасын арттыру бойынша жүйелі шаралар жалғасын табады. Түркістан облысында көктемгі дала және жиын-терім жұмыстарын сапалы әрі уақтылы жүргізуге, сондай-ақ ауыл шаруашылығы министрлігімен белгіленген негізгі нысаналы индикаторларға толық қол жеткізіледі деп жоспарланып отыр.
