Жанашырлық пен адалдықтың үлгісі

Жакибаев Асхат Қойшыбекұлы 1981 жылдың жазы – 13 маусым күні Оңтүстік Қазақстан облысының Түлкібас ауданындағы Ақбиік ауылында дүниеге келген. Қарапайым ауыл баласы еді, бірақ жүрегінде бір үлкен арман – адам өмірін сақтап қалуға деген құштарлық жатты. Бүгінде сол бала арманын адал еңбекпен жүзеге асырған білікті дәрігер, отбасылы азамат, үш баланың әкесі.

Мектепті тәмамдаған соң, 1998-2004 жылдары Оңтүстік Қазақстан мемлекеттік медицина академиясында «Емдеу ісі» мамандығын игерді. Дәрігерлік жолдың алғашқы қадамы оңай болған жоқ, бірақ Асхат ешқашан алған беттен қайтпайтын, табанды жан еді. 2004-2005 жылдары Шымкент қаласындағы облыстық клиникалық ауруханада интернатурадан өтіп, үлкен өмірге қадам басты.

Еңбек жолы 2005 жылы басталды. Түркістандағы Қожа Ахмет Ясауи атындағы халықаралық қазақ-түрік университетінің клиникасында анестезиолог-реаниматолог болып жұмысқа кірісті. Бұл мамандық – дәрігерлік жолдың ең жауапты салаларының бірі. Себебі ол науқастың өмірі қыл үстінде тұрған сәттерде шешім қабылдайды. Асхат Қойшыбекұлының әр күні адамдардың өмірі үшін арпалыспен өтті.

Қызметте өсуімен бірге жауапкершілік те артты. 2014 жылдан бастап анестезиология және реанимация бөлімінің меңгерушісі болды. 2019 жылдан бері Шымкент қаласындағы №2 қалалық ауруханада бас дәрігердің емдеу ісі жөніндегі орынбасары қызметін атқарып келеді. Әріптестері оны ұйымдастырушылық қабілеті мықты, кез келген қиын жағдайда дұрыс шешім қабылдай білетін көшбасшы ретінде бағалайды.

Асхат Қойшыбекұлы – жоғары санатты анестезиолог-реаниматолог, денсаулық сақтау саласындағы 16 жылдан астам тәжірибесі бар маман. Ол тек кәсіби біліктілігімен ғана емес, адалдығымен де үлгі. Президент Қасым-Жомарт Тоқаевтың «Адал азамат – халықтың сенімін ақтайтын тұлға. Ол өзінің ісімен де, сөзімен де елге қызмет етеді» деген сөздері Асхаттың өмір жолына дөп келеді.

Ол медицинадағы реформаларды іске асыруға, «Саламатты Қазақстан» мемлекеттік бағдарламасын жүзеге асыруға белсене атсалысты. Қоғамдық істерге де бейжай қарамайды, жас дәрігерлерге әрдайым жол көрсетіп, тәжірибесімен бөлісіп келеді.

Асхат Қойшыбекұлы – өз ісіне жан-тәнімен берілген, кәсіби адалдығы мен адамгершілігі арқылы ел сеніміне ие болған дәрігер. Оның өмір жолы – тек медицинаға емес, тұтас қоғамға қызмет етудің үлгісі.