Жарты ғасырлық ғұмырын медицинаға арнаған жан

Бердалиева Гүлжахан Назымбекқызы 1972 жылдың 22 наурызында Өзбекстанда дүниеге келген. Жастайынан медицинаға қызығушылық танытып, адамдардың саулығын сақтауды өмірлік мұрат етіп таңдады. Білімін жетілдіру мақсатында 1989 жылы Пермь медициналық университетінде оқып, кейін 1995 жылы Ташкент медициналық педиатриялық институтын тәмамдады. Осылайша, дәрігерлік жолға үлкен дайындықпен қадам басты.

1990 жылдардың ортасынан бастап Шымкент қаласындағы №3 қалалық аурухананың жүйке аурулар бөлімінде жұмыс істей бастады. Бүгінде жоғары санатты дәрігер-невролог, бөлім меңгерушісі ретінде 25 жылдан астам уақыт бойы үздіксіз еңбек етіп келеді. Оның кәсіби жолы – адам жанына шипа беруге арналған адал қызметтің айқын көрінісі.

Гүлжахан Назымбекқызы дәрігерлік мамандықты тек кәсіп емес, қоғам алдындағы үлкен жауапкершілік деп біледі. Ол әрдайым «Науқастың саулығы – ең жоғарғы құндылық» қағидатын ұстанып, диагноз қоюдағы дәлдігімен, ем жасаудағы тиімділігімен, қарым-қатынастағы ізгілігімен ерекшеленеді. Әріптестері арасында сыйлы, ұжымда беделді, жас мамандарға үлгі боларлық абыройға ие.

Президент Қасым-Жомарт Тоқаев: «Адал азамат – әділетті қоғамның тірегі. Халыққа қалтқысыз қызмет етіп, кәсіби адалдық танытқан әрбір маман – жаңа Қазақстанның шынайы құндылығы» деген болатын. Бердалиева Гүлжаханның еңбек жолы осы тұжырымдаманың нақты бейнесі іспетті. Ол адалдықты, адамгершілікті, жаңашылдықты ұштастырып, денсаулық сақтау саласының дамуына елеулі үлес қосып келеді.

Көп жылғы еңбегі мемлекет тарапынан жоғары бағаланды. Ол түрлі жылдары Сайрам ауданы әкімінің Алғыс хатымен (2010), облыстық кәсіподақ комитетінің Құрмет грамотасымен (2011), Оңтүстік Қазақстан облыстық Денсаулық сақтау басқармасының Құрмет грамотасымен (2012) марапатталды. 2014 жылы «Алтын дәрігер» медалін, 2016 жылы «Елеулі еңбегі үшін» медалін иеленді. 2019 жылы ҚР Денсаулық сақтау министрлігінің Құрмет грамотасымен, 2021 жылы Денсаулық сақтау басқармасының Алғыс хатымен марапатталды. Ал 2022 жылы «Денсаулық сақтау үздігі» белгісімен марапатталуы оның қажырлы еңбегіне берілген ең жоғарғы баға болды.

Бердалиева Гүлжахан Назымбекқызы – кәсібилігімен, қарапайымдылығымен, адалдығымен ерекшеленген тұлға. Ол тек білікті маман ғана емес, Президент Тоқаев айтқандай, елдің сенімін ақтайтын, қоғамның тірегіне айналған адал азаматтың жарқын үлгісі.