Воскресенье, 22 ноября

ЦИФРЛЫҚ ТЕХНОЛОГИЯ: ТҮРКІСТАН ОБЛЫСЫНДА ЗАМАНАУИ ҚЫЗМЕТ ТҮРЛЕРІ ЕНГІЗІЛУДЕ

0
25

Цифрлық технологиялардың күнделікті өмірге дендеп енуі тұрғындардан жаңа дағдыларды меңгеруді талап етеді. Бүгінде мемлекеттік қызмет алу, қаржылық операция жасау, білім іздеу және қажетті ақпаратқа қол жеткізу үшін цифрлық құралдарды пайдалана білу маңызды. Осыған орай Түркістан облысында халықтың цифрлық сауаттылығын арттыру, интернет кеңістігіндегі қауіпсіздік мәдениетін қалыптастыру және заманауи сервистерді тиімді қолдануға үйрету бағытында жүйелі жұмыстар жүргізілуде.

Өңірдегі ауқымды бастамалардың бірі – интернет-алаяқтықтың алдын алуға және азаматтардың қаржылық-цифрлық сауаттылығын бағалауға бағытталған жаппай тестілеу. «Киберқалқан» медиа-жоспары аясында ұйымдастырылған шараға 350 мыңнан астам адам қатысты. Оның ішінде 218 463-і – мектеп оқушысы, 56 563-і – жоғары және орта арнаулы оқу орындарының студенті, 86 244-і – педагог. Тестілеу арқылы қатысушылардың цифрлық ортадағы қауіп-қатерлерді тану, қаржылық алаяқтықтан сақтану және жеке деректерді қорғау жөніндегі білімі бағаланды.

Бұл бастама цифрлық сауаттылықтың маңызды бөлігі – қауіпсіздік дағдыларын қалыптастыруға бағытталған. Қазіргі таңда жалған банк қызметкерлерінің қоңырауы, фишингтік сілтемелер, күмәнді инвестициялық ұсыныстар мен әлеуметтік желілер арқылы жасалатын алаяқтық түрлері жиі кездеседі. Сондықтан тұрғындарға интернеттегі күмәнді ақпаратты ажырату, белгісіз сілтемелерге өтпеу, банк картасының деректері мен SMS-кодтарды бөгде адамдарға бермеу жөнінде түсіндіру жұмыстары жүргізілуде.

Аталған бағыттағы жұмысқа білім беру ұйымдары, полиция қызметкерлері және жастар ұйымдары да тартылған. 2026 жылғы шілдеде облыстық полиция департаменті мен жастар ұйымдары арасында интернет-алаяқтықтың алдын алу бойынша ынтымақтастық туралы меморандум жасалды. Оған жастар ресурстық орталықтарының 30-дан астам басшысы мен белсенді жастар қатысты. Мұндай өзара іс-қимыл цифрлық қауіпсіздік туралы ақпаратты жастар арасында кеңінен таратуға және алдын алу шараларын күшейтуге мүмкіндік береді.

Цифрлық сауаттылықты қалыптастыруда білім беру саласының орны ерекше. Облыста оқушылар мен педагогтердің технологиялық дағдыларын дамыту, электронды білім беру ресурстарын пайдалану және цифрлық құралдарды оқу үдерісіне енгізу жұмыстары жалғасуда. 2026 жылғы үшінші тоқсанның қорытындысы бойынша өңірдегі 940 мемлекеттік мектептің 932-сі немесе 99,1 пайызы интернет желісіне қосылған. Оның 646-сы талшықты интернетті, 284-і Starlink спутниктік байланысын пайдаланады. Сонымен қатар жаңадан пайдалануға берілген сегіз мектепті интернетке қосу жұмыстары жүргізілуде.

Интернетке қолжетімділік цифрлық дағдыларды меңгерудің негізгі алғышарты болғанымен, оны тиімді пайдалану да маңызды. Осы тұрғыда педагогтердің кәсіби құзыретін жетілдіру, білім беру платформаларымен жұмыс істеу және оқушылардың ақпаратты іздеу, бағалау, өңдеу қабілеттерін дамытуға басымдық беріліп отыр. Бұл дағдылар жас ұрпақтың технологияны тек тұтынушы ретінде емес, білім алу мен шығармашылыққа арналған құрал ретінде қолдануына жол ашады.

Халықтың мемлекеттік қызметтерді өз бетінше алуына жағдай жасау да осы жұмыстың маңызды бөлігі. Биыл 29 маусымда Түркістан қаласында жаңа форматтағы Smart Point цифрлық халыққа қызмет көрсету орталығы ашылды. Мұнда азаматтар электронды мемлекеттік сервистерді пайдалануды үйреніп, қажетті қызметтерді мамандардың көмегімен өздігінен рәсімдей алады. Мұндай орталықтар тұрғындардың электронды үкімет мүмкіндіктерін меңгеруіне және қызмет алу кезінде уақытын үнемдеуіне ықпал етеді.

Цифрлық сауаттылық – тек техникалық құрылғыларды қолдану қабілеті емес. Ол ақпараттың шынайылығын тексеру, жеке деректерді қорғау, онлайн төлемдерді қауіпсіз жасау, электронды құжаттармен жұмыс істеу және цифрлық қызметтерді дұрыс пайдалану мәдениетін қамтиды. Әсіресе ауыл тұрғындары, егде жастағы азаматтар мен интернетті енді меңгеріп жүрген адамдар үшін осындай білімнің қолжетімді болуы маңызды.

Бұл бағыттағы жұмыстар алдағы уақытта да жалғасады. Өйткені цифрлық технологиялардың пайдасын көру үшін инфрақұрылымның болуы жеткіліксіз, әр азамат оны сауатты әрі қауіпсіз қолдана білуі керек. Түркістан облысында жүзеге асырылып жатқан бастамалардың түпкі мақсаты да – тұрғындардың цифрлық мүмкіндіктерге тең қол жеткізуіне жағдай жасап, қоғамда жауапты цифрлық мәдениетті қалыптастыру.

 

Leave a reply